सेनेगलको राजधानी डकारमा शनिबार मध्यराति सम्पन्न रङ्गीन उद्घाटन समारोहसँगै युवा ओलम्पिकको नयाँ अध्याय सुरु भएको छ। अफ्रिकी भूमिमा पहिलोपटक आयोजना भएको ओलम्पिक प्रतियोगिताको मार्चपास्टमा नेपालको झन्डा पौडी खेलाडी आर्या महर्जन र अभिव प्रधानले बोके। समारोहमा नेपालसहित २०४ राष्ट्रका खेलाडी र युवा शरणार्थी ओलम्पिक टोली सहभागी भए।
आर्या र अभिव दुवैले केही समयअघि सम्पन्न आइची–नागोया एसियाली खेलकुदमा पनि नेपालको प्रतिनिधित्व गरेका थिए। अक्टोबर ३१ देखि नोभेम्बर १३ सम्म चल्ने यस प्रतियोगितामा नेपालले पौडी, उसु र जुडो गरी तीन खेलमा प्रतिस्पर्धा गर्नेछ। प्रतियोगितामा करिब दुई हजार ६५० युवा खेलाडीको सहभागिता छ भने २५ प्रतिस्पर्धात्मक र १० सहभागितामूलक खेल समावेश छन्।
नेपाली टोलीको सेफ दि मिसनको जिम्मेवारी नेपाल ओलम्पिक कमिटीका उपमहासचिव रामजीबहादुर श्रेष्ठले सम्हालेका छन् भने सचिव भीमसिंह गुरुङ अफिसियलका रूपमा टोलीमा छन्। पौडीतर्फ प्रशिक्षक शंकर कार्कीसँगै आर्या र अभिव प्रतिस्पर्धामा उत्रनेछन्। उसुमा प्रशिक्षक लानम लामाको मार्गदर्शनमा रश्मि तामाङले खेल्नेछिन् भने जुडोमा शुभानन तिमिल्सिनाले नेपालको प्रतिनिधित्व गर्नेछन्।
डकार युवा ओलम्पिक सेनेगलका डकार, डियामनियाडो र साली गरी तीन सहरमा आयोजना हुँदैछ।
