पोखरा — अदालतबाट दोषी ठहर भए पनि सजाय नभोगी भागिरहेका ३२ जनालाई कास्की प्रहरीले गत असोज महिनामा पक्राउ गरेको छ । जिल्ला प्रहरी कार्यालय कास्कीले फरार प्रतिवादीहरूविरुद्ध चलाएको विशेष अभियानअन्तर्गत उनीहरूलाई विभिन्न स्थानबाट नियन्त्रणमा लिइएको हो ।
पक्राउ पर्नेमा २३ जना पुरुष र नौ जना महिला छन् । कार्यालयका सूचना अधिकारी प्रहरी नायब उपरीक्षक वीरेन्द्रकुमार पासवानका अनुसार पक्राउ परेकालाई तोकिएको कैद सजाय भुक्तान गराउन र जरिवाना असुल गर्न अदालतमा बुझाइएको छ ।
उनीहरूबाट कुल १२ वर्ष छ महिना आठ दिनको कैद सजायको लगत उठाइएको छ भने १६ लाख ६६ हजार नौ सय ७२ रुपैयाँ जरिवाना पनि असुलउपर भएको छ । चेक अनादर, आर्थिक लेनदेनसम्बन्धी ठगी, बैंकिङ कसुर, सवारी ज्यान र अभद्र व्यवहारजस्ता मुद्दामा दोषी ठहर भएकाहरू पक्राउ परेका हुन् ।
प्रहरीका अनुसार फरार प्रतिवादीलाई कानुनी दायरामा ल्याउन पछिल्लो समय सक्रियता बढाइएको छ । यसअघि भदौ महिनामा कास्कीमा ५६ जना फरार प्रतिवादी पक्राउ परेका थिए भने असोजमा चालु मुद्दामा समेत ११२ जनालाई नियन्त्रणमा लिइएको छ ।
सोही महिनामा जिल्लामा अपराधसम्बन्धी १५९ वटा मुद्दा दर्ता भएका छन् । तीमध्ये २५ जघन्य तथा गम्भीर अपराध, सात महिला, बालबालिका तथा ज्येष्ठ नागरिकसँग सम्बन्धित, २४ आर्थिक अपराध र १०३ अन्य अपराधका छन् । त्यस्तै, सामाजिक हिंसासम्बन्धी ६९ वटा ठाडो उजुरी परेको प्रहरीले जनाएको छ ।
