तनहुँ — दिवंगत पत्रकार तथा साहित्यकार वसन्तप्रकाश उपाध्यायको परिवारका लागि १६ लाख ७ हजारभन्दा बढी रकम संकलन भएको छ। तनहुँ अन्तर्राष्ट्रिय समाज, तनहुँ समाज अमेरिका र नेपाल–अमेरिका पत्रकार संघ (नेजा) को संयुक्त पहलमा नेपाल पत्रकार महासंघमार्फत कुल १६ लाख ७ हजार ८ सय ३२ रुपैयाँ जुटेको हो।
संकलित रकममध्ये उपाध्यायकी धर्मपत्नी इन्दिरा कार्की उपाध्यायको उपचारका लागि १२ लाख ५ हजार ८ सय ७५ रुपैयाँ हस्तान्तरण गरिएको छ। तनहुँ अन्तर्राष्ट्रिय समाजका अध्यक्ष राजन त्रिपाठीले इन्दिरालाई भेटेर उक्त रकमको चेक प्रदान गरेका हुन्।
संकलित रकममध्ये बाँकी ४ लाख १ हजार ९ सय ५७ रुपैयाँ दसैँलगत्तै स्व. उपाध्यायका ९४ वर्षीय बुबा छायाँदत्त उपाध्यायको बैंक खातामा जम्मा गरिने समाजले जनाएको छ।
गोरखापत्र दैनिकका पूर्वमहाप्रबन्धकसमेत रहेका वसन्तप्रकाश उपाध्यायको गत महिना निधन भएको थियो। तनहुँको भानु नगरपालिका–१, भन्सार निवासी उपाध्यायको परिवारको उपचार तथा आर्थिक भार हल्का पार्ने उद्देश्यले उक्त रकम जुटाइएको हो। विदेशमा रहेका तनहुँवासी तथा पत्रकार समुदायले अभियानमा उल्लेखनीय साथ दिएको जनाएको छ।
सहयोग अभियानमा सहभागी संस्थाले पीडित परिवारलाई थप आर्थिक तथा उपचार सहायता निरन्तर उपलब्ध गराइरहने प्रतिबद्धता पनि जनाएका छन्।
