रसुवाको प्रसिद्ध पर्यटकीय गन्तव्य लाङटाङ क्षेत्रमा पर्यटकको आगमन बढ्न थालेको छ। यातायात सहज भएपछि यो क्षेत्रमा पर्यटक आउने क्रम सुरु भएको हो। फलाखु खोलामा अस्थायी बेलिब्रिज सञ्चालनमा आएपछि लाङटाङ जाने बाटो खुलेको छ।
यातायात पूर्ण रूपमा सञ्चालनमा आएपछि पर्यटकको आगमन बाक्लिएको लाङटाङस्थित ‘माउन्टेन भ्यु’ का प्रोपाइटर निमा लामाले जानकारी दिए। पर्यटक आउन थालेपछि यस क्षेत्रका पर्यटन व्यवसायीमा उत्साह थपिएको उनको भनाइ छ।
जिल्ला सदरमुकाम धुन्चेबाट दुई दिनको पैदल यात्रापछि लाङटाङ पुग्न सकिन्छ। अहिले धुन्चेबाट ठूलो भार्खु, सानो भार्खु, ब्राबल, ठूलो स्याफ्रु, पहिरो, बम्बो, रिमिचे र लामा होटल हुँदै लाङटाङ पुग्ने वैकल्पिक मार्ग तय गरिएको छ।
लाङटाङका वडाध्यक्ष डुण्ढु ज्याङवा तामाङले गत भदौ १० गतेको भोटेकोशी बाढीको विपत्तिलाई बिर्सिएर पर्यटकहरू फर्किन थालेको बताए। गोसाइँकुण्ड गाउँपालिका–४ मा पर्ने यो पर्यटकीय क्षेत्र लाङटाङ राष्ट्रिय निकुञ्ज क्षेत्रमा पर्छ।
