मुगु र हुम्लाका विभिन्न बस्तीमा नेपाल टेलिकमको इन्टरनेट तथा टेलिफोन सेवा प्रभावित भएको छ। मुगुको रुघा र सोरु गाउँपालिकास्थित नाथर्पुका टावरमा जडान गरिएका ‘लिङ्क डिभाइस’मा समस्या आएपछि सञ्चार सेवा अवरुद्ध भएको हो।
गत सातादेखि देखिएको यो प्राविधिक समस्या दसैँपछि मात्रै समाधान हुने टेलिकमले जनाएको छ। टेलिकमको मुगु कार्यालयका प्रमुख उमेश चौधरीका अनुसार दसैँ बिदामा कर्मचारी घर गएकाले तत्काल मर्मत गर्न नसकिने हो।
टावरमा समस्या आएपछि मुगुको सोरु गाउँपालिकासँगै हुम्लाका अदानचुली, ताँजाकोट, सर्केगाड र चङ्खेली गाउँपालिकाका अधिकांश बस्तीमा सञ्चार सेवा प्रभावित भएको छ। अदानचुली गाउँपालिका–४ का वडासदस्य सिंह बोहराले समस्या समाधानका लागि टेलिकमका कर्मचारीलाई पटक–पटक आग्रह गरेको बताएका छन्।
सञ्चार अवरुद्ध हुँदा दसैँमा घर आउने वा बाहिरिने आफन्तसँग सम्पर्क गर्न र रकम पठाउनसमेत समस्या भएको स्थानीयको गुनासो छ। भौगोलिक विकटताका कारण वैकल्पिक सञ्चार माध्यमको पहुँचसमेत सहज नभएका यी क्षेत्रका नागरिक सेवा अवरुद्ध हुँदा थप मारमा परेका छन्।
