काठमाडौं । पीएचपी प्रविधिमा देखिएको एक गम्भीर सुरक्षा कमजोरीपछि केही सरकारी वेबसाइट तथा अनलाइन प्रणाली अस्थायी रूपमा बन्द गरिएको छ । प्रधानमन्त्री तथा मन्त्रिपरिषद्को कार्यालयअन्तर्गतको सफ्टवेयर विकास तथा सञ्चालन केन्द्र (एसडीओसी) ले सम्भावित साइबर आक्रमणबाट जोगिन यो कदम चालेको जनाएको हो ।
केन्द्रले जारी गरेको जरुरी सुरक्षा सूचनाअनुसार ‘पीएचपीटुशेल’ नाम दिइएको उक्त कमजोरीबाट आक्रमणकारीले सर्भरमा अनाधिकृत कोड चलाउन सक्छन् — अर्थात् दूरबाटै प्रणालीमा प्रवेश पाउन सक्छन् । यसलाई सीभीएसएस मापदण्डमा ९.२ अंक दिइएको छ, जुन अत्यन्तै जोखिमपूर्ण स्तर हो । उक्त त्रुटि ‘सीभीई-२०२६-१०९६१८’ र ‘सीभीई-२०२६-१०९६१९’ नामबाट दर्ता भएका छन् ।
दशैंको बिदाका बीच पनि केन्द्रका प्राविधिक टोली जोखिम नियन्त्रणमा खटिएका छन् । सुरक्षा प्याच हाल्ने, परीक्षण गर्ने र प्रमाणीकरण पूरा गरेपछि बन्द प्रणालीहरूलाई चरणबद्ध रूपमा पुनः सञ्चालनमा ल्याउने योजना रहेको सूचनामा उल्लेख छ ।
