सिन्धुली — जेनजी आन्दोलनका दिनहरूमा ललितपुरस्थित नख्खु कारागारबाट फरार भएका एक कैदीलाई प्रहरीले सिन्धुलीमा पक्राउ गरेको छ। चोरी मुद्दामा दुई वर्षको कैद र २० हजार रुपैयाँ जरिवानाको सजाय पाएका सिन्धुलीको फिक्कल गाउँपालिका–६ निवासी जीवन लामा कात्तिक ५ गते अपराह्न करिब साढे ४ बजे नियन्त्रणमा लिएका हुन्।
मानबहादुर तामाङका छोरा लामालाई प्रहरी चौकी रत्नावतीबाट खटिएको प्रहरी टोलीले पक्राउ गरेको जिल्ला प्रहरी कार्यालय सिन्धुलीले जनाएको छ। आन्दोलनको उथलपुथलका बेला कारागारबाट भागेका उनलाई पक्राउ गरेपछि आवश्यक कारबाहीका लागि कारागार कार्यालय सिन्धुली पठाइएको प्रहरीले बताएको छ।
जिल्ला प्रहरी कार्यालय सिन्धुलीका प्रहरी निरीक्षक उज्ज्वल कार्कीले जारी गरेको प्रेस नोटमा पक्राउसम्बन्धी विवरण सार्वजनिक गरिएको छ। जेनजी आन्दोलनका क्रममा देशभरका विभिन्न कारागारबाट कैदीहरू फरार भएका थिए, जसमध्ये कतिपय अझै फरार रहेको र उनीहरूको खोजी प्रहरीले निरन्तर जारी राखेको छ।
