युरोपेली सङ्घभित्र व्यवसाय सुरु गर्न चाहने उद्यमीहरूका लागि नयाँ ढोका खुल्ने भएको छ। ईयूका सदस्य राष्ट्रहरूले शुक्रबार ‘पान–युरोपियन’ कम्पनी स्थापना गर्ने महत्वाकांक्षी योजनालाई समर्थन जनाएका छन्। यस योजनाअन्तर्गत उद्यमीले पूर्ण रूपमा अनलाइन माध्यमबाट दुई दिनभित्र कम्पनी दर्ता गर्न सक्नेछन्।
‘ईयू इङ्क’ नाम दिइएको प्रस्तावको मुख्य उद्देश्य नवीन सोचमा आधारित स्टार्टअपलाई विस्तार गर्न सजिलो बनाउनु र युरोपको प्रतिस्पर्धात्मक क्षमता बढाउनु रहेको छ। यसलाई संयुक्त राज्य अमेरिका र चीनसँग प्रतिस्पर्धा गर्न सक्ने व्यावसायिक वातावरण निर्माण गर्ने महत्वपूर्ण कदमका रूपमा हेरिएको छ।
नयाँ व्यवस्थाअनुसार उद्यमीले युरोपेली सङ्घको जुनसुकै सदस्य राष्ट्रबाट १०० युरो (करिब ११२ अमेरिकी डलर) भन्दा कम खर्चमा कम्पनी दर्ता गर्न सक्नेछन्। यसरी दर्ता भएका कम्पनीले ईयूको एकल बजारभर व्यवसाय सञ्चालन गर्न पाउनेछन्, जसले विभिन्न देशमा सञ्चालन गर्दा सामना गर्नुपर्ने प्रशासनिक झन्झट घटाउनेछ।
‘२८औँ व्यवस्था’ का रूपमा समेत चिनिने यस प्रस्तावले सदस्य राष्ट्रहरूका विद्यमान कम्पनी कानुनभन्दा अलग ईयूभर लागू हुने साझा व्यवस्था निर्माण गर्ने लक्ष्य राखेको छ।
प्रक्रिया सरल बनाइए पनि आर्थिक अपराध नियन्त्रणमा कडाइ यथावत् छ। ईयूको अध्यक्षता गरिरहेको आयरल्यान्डका अनुसार सम्पत्ति शुद्धीकरण वा आतङ्कवादी गतिविधिमा वित्तीय सहयोगको जोखिम देखिएमा अधिकारीहरूले कम्पनी दर्ता अस्वीकार गर्न सक्नेछन्।
प्रस्तावलाई कानुनी मान्यता दिन सदस्य राष्ट्रहरू र युरोपेली संसदबीच वार्ता गरी अन्तिम मस्यौदा पारित हुनुपर्नेछ। ईयूको कार्यकारी निकायले सन् २०२६ को अन्त्यसम्ममा विधायी प्रक्रिया पूरा हुने अपेक्षा गरेको छ। युरोपेली संसदमा प्रस्ताव अघि बढाइरहेका सांसद रेने रेपासीले कम्पनीका निर्णय प्रक्रियामा कर्मचारीको सहभागिता र श्रम कानुनको संरक्षण बलियो हुनुपर्ने बताएका छन्।
