लन्डन। बेलायतको मेट्रोपोलिटन प्रहरीले डचेस अफ ससेक्स मेगन मार्कलका बुबा थोमस मार्कलसँग सम्बन्धित गम्भीर आरोप उल्लेख भएको पत्र सन् २०१९ मा नै प्राप्त भएको स्वीकार गरेको छ। यद्यपि, उक्त पत्रबारे अन्य कानुन कार्यान्वयन निकायलाई जानकारी नदिइएको पनि प्रहरीले बताएको छ।
स्कटल्यान्ड यार्डको विज्ञप्तिअनुसार उक्त पत्र सन् २०१९ को जनवरीमा आइपुगेको थियो र त्यसमा बेलायतबाहिर भएको भनिएको अपराधसम्बन्धी दाबी समेटिएको थियो। मेगन र उनका पति राजकुमार ह्यारीको सुरक्षाको संवेदनशीलतालाई ध्यानमा राखेर उक्त जानकारी उनीहरूको कार्यालयलाई मात्र दिइएको प्रहरीको भनाइ छ।
गत शुक्रबार सार्वजनिक भएको एक रिपोर्टमा ८२ वर्षीय थोमसको फिलिपिन्सस्थित पुरानो घरमा बाल यौन दुर्व्यवहारसँग सम्बन्धित सामग्री भेटिएको दाबी गरिएको छ। मेगनका सौतेनी भाइ थोमस मार्कल जुनियरले गत जुलाईमा अमेरिकी अनुसन्धान निकाय एफबीआईलाई यसबारे जानकारी दिएको बताएका छन्। हाल अमेरिकामा रहेका थोमसले भने आफूसँग त्यस्ता सामग्री नरहेको भन्दै आरोप अस्वीकार गरेका छन्।
प्रहरीले सन् २०१९ मा यो विषयलाई कसरी सम्बोधन गरिएको थियो भन्नेबारे आन्तरिक समीक्षा चलिरहेको जनाएको छ। प्रहरीको कामकारबाहीमाथि निगरानी गर्ने स्वतन्त्र निकायलाई यसबारे जानकारी दिने कि नदिने भन्नेबारे पनि विचार भइरहेको छ।
यसैबीच मेगनले शुक्रबार विज्ञप्ति जारी गर्दै बुबामाथिका आरोपबारे आफू जानकार रहेको बताएकी छन्। त्यसबेला छानबिन भइरहेको आश्वासन पाएको उनको भनाइ छ। बुबासँग दूरी कायम राख्नुको र आफ्ना छोराछोरीलाई उनीसँग भेट्न नदिनुको कारण अब सबैले बुझ्ने उनले आशा व्यक्त गरेकी छन्।
फिलिपिन्सका अधिकारीहरूले पनि यस विषयमा छानबिन थालेका छन्। त्यहाँको मानव बेचबिखन तथा बाल यौन शोषणविरुद्धको कार्यदलले आरोपमाथि अनुसन्धान गरिरहेको छ भने गृहमन्त्री जोन्भिक रेमुल्लाका अनुसार राष्ट्रिय प्रहरीले थोमसको कम्प्युटर नियन्त्रणमा लिएर डिजिटल फरेन्सिक परीक्षण गर्नेछ।
