अमेरिकी राष्ट्रिय गुप्तचर प्रमुख जे क्लेटनले इरानले मध्यपूर्व र अन्य क्षेत्रमा अमेरिकीहरूलाई निसाना बनाउने प्रयास उल्लेखनीय रूपमा बढाएको चेतावनी दिएका छन्। उनले शुक्रबार यस्तो चेतावनी दिएका हुन्।
यो चेतावनी यमनका हूथीहरूबाट बढ्दो आक्रमणपछि वासिङ्टनले यस हप्ता साउदी अरबबाट गैरआवश्यक दूतावास कर्मचारी र उनीहरूका परिवारलाई फिर्ता बोलाएको केही दिनपछि आएको हो।
यस महिना साउदी अरबमा इरान समर्थित समूहबाट लगभग दैनिक आक्रमण भइरहेका छन्। तीमध्ये रियादको अन्तर्राष्ट्रिय विमानस्थलमा भएको आक्रमण साउदी अरबमा वर्षौँयताकै सबैभन्दा घातक आक्रमण थियो।
क्लेटनले विदेशमन्त्री मार्को रुबियोलाई पठाएको ज्ञापनपत्रमा इरानले अमेरिकी कर्मचारीलाई निसाना बनाउने प्रयास उल्लेखनीय रूपमा बढाएको गोप्य जानकारी प्राप्त भएको उल्लेख छ। एक अमेरिकी अधिकारीले सो पत्रबारे जानकारी दिएका हुन्।
पत्रमा अमेरिकी नागरिकविरुद्ध इरानीहरूको घातक षड्यन्त्र प्रयास मध्यपूर्व र केही अन्य देशमा उच्च चरणमा पुगेको उल्लेख छ। आक्रमण प्रयासबारे पहिलो रिपोर्ट एक्सियोसले यसअघि नै गरेको थियो।
वासिङ्टनले यसअघि पनि इरानविरुद्ध युद्ध सुरु हुनुअघि खाडीबाट गैरआवश्यक कर्मचारी फिर्ता बोलाएको थियो। तर जुलाईमा राष्ट्रपति डोनाल्ड ट्रम्पले नयाँ आक्रमणको लहर रद्द गरेपछि फिर्ता गर्ने अभियान सुस्त भएको थियो।
अमेरिकी अधिकारीले दूतावासमा कर्मचारी राख्ने विषयमा सुरक्षा वातावरणबारे नयाँ जानकारी निरन्तर मूल्याङ्कन गरिरहेको बताएका छन्। हूथी आक्रमणको खतरा र अमेरिकी अधिकारीलाई निसाना बनाउने इरानी षड्यन्त्रले आफ्ना निर्णय प्रभावित पारिरहेको उनले बताए।
ट्रम्पले शुक्रबार अमेरिका इरानविरुद्ध फेरि सैन्य कारबाही सुरु गर्न सक्ने बताएका थिए। ‘हामी अर्को सानो एपिक फ्युरी गर्न सक्छौँ’ भन्दै उनले आक्रमणको नाम उल्लेख गरे तर समयबारे केही बताएनन्। फेब्रुअरीको अन्त्यमा इरानमाथि अमेरिकी–इजरायली आक्रमणपछि मध्यपूर्वमा द्वन्द्व सुरु भएको थियो, जसमा इरानका सर्वोच्च नेतासहित वरिष्ठ सैन्य कमाण्डर मारिएका थिए।
