फ्रान्समा शनिबार सरकारविरुद्ध फेरि ठूलो जनप्रदर्शन भएको छ। राष्ट्रपति इमानुएल म्याक्रोनको सरकार, बढ्दो महँगी र बढ्दै गएको असमानताविरुद्ध देशका विभिन्न शहरमा हजारौँ मानिस सडकमा उत्रिए। केही ठाउँमा प्रदर्शनकारी र प्रहरीबीच तनाव पनि देखियो।
गृहमन्त्री लरेन्ट नुनेजका अनुसार अशान्ति मच्चाएको आरोपमा देशभर १३५ जनालाई पक्राउ गरिएको छ। शनिबार दिउँसोसम्म देशभर करिब ३५ हजार मानिस प्रदर्शनमा सहभागी भएको उनले बताएका छन्।
गत साता भएको हिंसात्मक प्रदर्शनपछि यसपटक प्रशासनले कडा सुरक्षा व्यवस्था गरेको थियो। पेरिस, मार्सेली र लियोनजस्ता ठूला शहरमा कर्फ्यु र निषेधाज्ञा लागू गरियो भने कडा जाँच पनि चलाइयो। तर कडा नियमसहित केही ठाउँमा शान्तिपूर्ण प्रदर्शनको अनुमति दिइएको थियो।
पेरिसमा अनुमति प्राप्त मार्गमा हजारौँ मानिसले शान्तिपूर्ण र्याली निकाले। प्रहरीले राजधानीको अवस्था सामान्य रहेको दाबी गरेको छ। तर नान्टेस र लियोनमा निषेधित क्षेत्र तोड्न खोजेपछि प्रहरीले अश्रुग्याँस र पानीको फोहोरा प्रयोग गर्यो। जिरोन्डमा जाँचका क्रममा खतरनाक वस्तुसहित १३ जना नियन्त्रणमा लिइए। बोर्डो र स्ट्रासबर्गमा पनि हजारौँको र्याली भयो।
प्रदर्शनकारीले सरकारले आफ्नो आवाज नसुनेको, अत्यधिक कर लगाएको र धनीलाई मात्र फाइदा पुर्याएको आरोप लगाएका छन्। पेरिसमा सहभागी एक युवाले विरोध गर्ने अधिकारकै लागि पनि लडिरहेको बताए। अर्की महिला प्रदर्शनकारीले स्वतन्त्रता, समानता र भ्रातृत्वको आदर्श अन्याय र विशेषाधिकारमा परिणत भएको गुनासो गरिन्। युवाहरूले रोजगारीको अभाव र कमजोर शिक्षा प्रणालीले आफूहरूलाई सडकमा आउन बाध्य बनाएको बताएका छन्।
वामपन्थी नेता जिन-लुक मेलेनचोन पनि पेरिसको प्रदर्शनमा सहभागी भए। उनले जनताको अनुशासित उपस्थिति देखेर राष्ट्रपति म्याक्रोनले हार मान्नुपर्ने र माग सम्बोधन गर्नुपर्ने बताए।
गत साताको प्रदर्शन उग्र हुँदा २ हजार ७०० भन्दा बढी पक्राउ परेका थिए भने पसल र ऐतिहासिक भवनमा आगजनी भएको थियो। आन्दोलनको असर छिमेकमा पनि देखिन थालेको छ — मिलानमा शनिबार सयौँ सेना परिचालन गरियो र पसल बन्द गरिए।
