काठमाडौं । नेकपा एमाले संसदीय दलकी उपनेता पद्माकुमारी अर्यालले प्रहरी अनुसन्धानमा रहेको व्यक्तिको मोबाइल प्रधानमन्त्रीका सल्लाहकारको निवासमा पुग्नु सत्ताको चरम दुरुपयोग भएको बताएकी छन् ।
बिहीबार सिंहदरबारमा सञ्चारकर्मीसँग कुरा गर्दै अर्यालले अनुसन्धानमा रहेको व्यक्तिको मोबाइल दुई दिनसम्म सल्लाहकारको घरमा रहनु, त्यसबाट सन्देश मेटिनु र स्क्यान गरिनुजस्ता कुराले प्रमाण नष्ट हुने गम्भीर आशङ्का जन्माएको बताइन् । सुशासनको नारा दिएर आएको सरकारले कानुनी र नैतिक दुवै हिसाबले यस घटनाको जवाफ दिनुपर्ने उनको भनाइ छ ।
अर्यालले यस प्रकरणमा जोडिएका व्यक्तिहरूमाथि छानबिन हुनुपर्ने माग गरिन् । नेपाल प्रहरी कुनै दल वा व्यक्तिको निजी संस्था नभई राज्यको व्यावसायिक र स्वतन्त्र संस्था भएको उल्लेख गर्दै उनले प्रहरीमाथिको हस्तक्षेपले शान्ति सुरक्षालाई कमजोर बनाउने बताइन् ।
वर्तमान सरकार रास्वपा नेतृत्वको भएकाले सरकारले गरेका कामको जवाफदेहीता पनि रास्वपाले लिनुपर्ने अर्यालको तर्क छ ।
