भारतको आन्ध्र प्रदेशमा शक्तिशाली चक्रवात ‘अर्नब’का कारण कम्तीमा सात जनाको मृत्यु भएको छ। चक्रवातले घर, सडक, विद्युत् संरचना र कृषि बालीमा व्यापक क्षति पुर्याएको छ। आन्ध्र प्रदेशमा मात्र एक लाख ८० हजारभन्दा बढी मानिसलाई सुरक्षित स्थानमा सारिएको अधिकारीहरूले बताएका छन्।
एसोसिएटेड प्रेसका अनुसार बुधबार बिहान भारतको पूर्वी तटीय क्षेत्रमा प्रवेश गर्दा चक्रवात सुरुमा ‘अति शक्तिशाली चक्रवाती आँधी’ को अवस्थामा थियो। स्थलभागतर्फ अघि बढ्दै जाँदा यसको शक्ति घटेर ‘शक्तिशाली चक्रवाती आँधी’ मा सीमित भएको भारतको मौसम विज्ञान विभागले जनाएको छ। आन्ध्र प्रदेशको विपद् व्यवस्थापन निकायका अनुसार बुधबार बिहानसम्म हावाको गति प्रतिघण्टा १३५ किलोमिटर पुगेको थियो।
आन्ध्र प्रदेशका मुख्यमन्त्री एन. चन्द्रबाबु नायडूले राज्यका १४ तटीय जिल्ला चक्रवातबाट नराम्ररी प्रभावित भएको बताएका छन्। तीव्र हावा र भारी वर्षाले घर, सडक सञ्जाल, विद्युत् खम्बा तथा विद्युत् आपूर्ति प्रणालीमा व्यापक क्षति पुर्याएको उनले बताए। क्षतिको व्यवस्थापन र उद्धारका लागि उनले केन्द्र सरकारसँग तत्काल सहयोग मागेका छन्। चक्रवातका कारण करिब ७९ हजार एकड क्षेत्रफलमा लगाइएको कृषि बालीमा क्षति पुगेको छ भने दर्जनौँ घरसमेत प्रभावित भएका छन्। कोनासीमा जिल्ला प्रभावित क्षेत्रमध्ये परेको छ, जहाँ केरा र नरिवलका बगैँचामा ठूलो क्षति पुगेको छ।
आन्ध्र प्रदेशका २० जिल्लामा दुई हजारभन्दा बढी चक्रवात आश्रयस्थल स्थापना गरिएको छ। तटीय क्षेत्रमा रहेका ३० हजारभन्दा बढी माछा मार्ने डुंगा सुरक्षित स्थानमा राखिएका छन् भने प्रभावित क्षेत्रमा करिब एक हजार १०० स्वास्थ्य टोली परिचालन गरिएको छ। छिमेकी ओडिशा राज्यमा पनि करिब ४८ हजार मानिसलाई सुरक्षित स्थानमा सार्ने तयारी गरिएको थियो। केही रेल सेवा रद्द गरिएका छन् भने आन्ध्र प्रदेशका तीन वटा विमानस्थलमा उडान सेवा स्थगित गरिएको थियो।
