सिड्नी — अस्ट्रेलियाको सर्वोच्च अदालतमा मंगलबार १६ वर्षमुनिका बालबालिकालाई सामाजिक सञ्जाल प्रयोगमा रोक लगाउने कानुनमाथि दुई दिनसम्म चल्ने सुनुवाइ सुरु भयो। यो कानुन गत डिसेम्बर १० देखि लागू भएको थियो।
कानुनको विरोधमा दुई पक्षले छुट्टाछुट्टै मुद्दा हालेका छन् — न्यु साउथ वेल्सका सांसद जोन रुडिकको नेतृत्वमा रहेको डिजिटल फ्रिडम प्रोजेक्ट र सामाजिक सञ्जाल कम्पनी रेडिट। अदालतले दुवै मुद्दाको सुनुवाइ एकसाथ गरिरहेको छ।
डिजिटल फ्रिडम प्रोजेक्टको दाबी छ, प्रतिबन्धले बालबालिकाको स्वतन्त्र रूपमा सञ्चार गर्ने अधिकार खोस्छ। रेडिटको तर्क छ, यसले प्रयोगकर्ताको गोपनीयता र राजनीतिक अधिकारमा असर पुर्याउँछ र प्रतिबन्धको साटो अनलाइन सुरक्षाका राम्रा उपाय अपनाउनुपर्छ।
सरकारले भने बालबालिकालाई अनलाइनका हानिकारक सामग्रीबाट बचाउन यस्तो कदम आवश्यक रहेको बताउँदै आएको छ। सञ्चारमन्त्री अनिका वेल्सले ठूला प्रविधि कम्पनीहरूको कानुनी चुनौतीबाट सरकार पछि नहट्ने बताएकी छन्।
कानुनअनुसार फेसबुक, इन्स्टाग्राम, टिकटक, युट्युब, रेडिट, स्न्यापच्याट, एक्स, किक, थ्रेड्स र ट्विचले १६ वर्षमुनिका बालबालिकाको पहुँच रोक्नुपर्छ। नियमको गम्भीर उल्लंघन गरे कम्पनीलाई ९ करोड ९० लाख अस्ट्रेलियन डलरसम्म जरिवाना लाग्न सक्छ। ह्वाट्सएप, रोब्लोक्स, डिस्कोर्ड, युट्युब किड्स र गुगल क्लासरुम भने प्रतिबन्धको दायराबाहिर छन्।
कानुन लागू भएपछि मेटाले करिब पाँच लाख खाता बन्द गरेको बताएको थियो। तर कतिपय बालबालिकाले उमेर जाँच्ने प्रणाली छलेर अझै सामाजिक सञ्जाल प्रयोग गरिरहेको बताएका छन्।
