सुनसरी । इनरुवा नगरपालिका–४ को ज्ञानोदय टोलस्थित एक घरमा लुकाइएको ९१५ किलो ६८० ग्राम गाँजासहित प्रहरीले चार जनालाई नियन्त्रणमा लिएको छ । आइतबार बिहान हनुमान मन्दिरनजिक रहेको बुलबुल यादवको घरमा खानतलासी गर्दा उक्त परिमाणको लागूऔषध बरामद भएको हो ।
जिल्ला प्रहरी कार्यालयका सहायक सूचना अधिकारी हेमराज ओलीका अनुसार विशेष सूचनाका आधारमा गरिएको तलासीमा ठूलो मात्रामा गाँजा फेला परेको हो । पक्राउ पर्नेहरूमा इनरुवा नगरपालिका–४ कै ३६ वर्षीय बुलबुल यादव, २३ वर्षीय सन्तोष यादव र ३० वर्षीय आशिष यादव छन् । उनीहरूसँगै दुहबी नगरपालिका–१० का २२ वर्षीय कुन्दन यादव पनि पक्राउ परेका छन् । प्रहरीले उनीहरूको साथबाट एक थान मोटरसाइकलसमेत नियन्त्रणमा लिएको छ ।
प्रहरीको प्रारम्भिक अनुमानमा पक्राउ परेकाहरू गाँजाको सञ्चय र ओसारपसारमा संलग्न रहेको हुन सक्ने देखिएको छ । घटनाबारे थप अनुसन्धान भइरहेको प्रहरीले जनाएको छ । लागूऔषध नियन्त्रण ऐनबमोजिम उनीहरूमाथि कानुनी कारबाही अघि बढाइने भएको छ । कोशी प्रदेशमा पछिल्लो समय ठूलो परिमाणका गाँजा बरामदका घटना बढ्न थालेका छन् ।
