कञ्चनपुर । सीमावर्ती नाकामा तालिम प्राप्त कुकुरको सहयोगमा लागुऔषध तस्करीको प्रयास विफल भएको छ । सशस्त्र प्रहरीको डग स्क्वाड टोलीले आइतबार कञ्चनपुरमा मुखभित्र लुकाएर ल्याइएको खैरो हिरोइनसहित एक जनालाई नियन्त्रणमा लिएको छ ।
भीमदत्त नगरपालिका–१० स्थित भन्सार बेरियलमा नियमित चेकजाँचका क्रममा सीमा सुरक्षा गुल्म गड्डाचौकीबाट खटिएको सशस्त्र प्रहरीको टोलीले यात्रुमाथि जाँच चलाइरहेको थियो । सोही क्रममा ‘अल्फा’ नामक लेब्राडोर जातको कुकुरको सहयोगमा कैलालीको घोडाघोडी नगरपालिका–६ अस्नेराका २४ वर्षीय विक्रम मिजारको मुखभित्र लुकाइएको ०.१६ ग्राम खैरो हिरोइन (ब्राउन सुगर) फेला परेको हो ।
लागुऔषध फेला परेपछि सशस्त्र प्रहरीले मिजारलाई बरामद पदार्थसहित नियन्त्रणमा लिएको थियो । आवश्यक अनुसन्धान तथा थप कारबाहीका लागि उनलाई जिल्ला प्रहरी कार्यालय कञ्चनपुर पठाइएको सशस्त्र प्रहरीले जनाएको छ ।
