काठमाडौँ। इरान र पाकिस्तानबिचको सीमापार आवागमन तथा व्यापार अस्थायी रूपमा बन्द भएको छ। प्राविधिक कठिनाइ र सुरक्षा चिन्ता देखाउँदै दुवै देशले शुक्रबारदेखि सीमा नाकामार्फत हुने आवागमन र व्यापारिक गतिविधि स्थगित गरेका हुन्। सम्बन्धित अधिकारीहरू भने नाकालाई सकेसम्म छिटो सामान्य अवस्थामा फर्काउने प्रयासमा जुटेका छन्।
इरानको विदेश मन्त्रालयका प्रवक्ता इस्माइल बाघाईले शनिबार केही प्राविधिक समस्या र सावधानीका उपाय आवश्यक भएकाले सीमापार आवागमन रोकिएको जानकारी दिए। इरानी समाचार संस्था इरनालाई दिएको भनाइमा उनले दुवै देशका अधिकारीहरू समस्या समाधानका लागि नजिकबाट सहकार्य गरिरहेको बताए।
यता पाकिस्तानले गब्द–रिमदान र तफ्तानका आधिकारिक सीमा नाकाबाट हुने व्यापार शुक्रबारदेखि रोकेको छ। पाकिस्तानी अखबार डनका अनुसार वाणिज्य मन्त्रालयले अक्टोबर ३ मा जारी गरेको आदेश खारेज गर्दै नयाँ सूचना जारी गरेपछि व्यापार रोकिएको हो।
बलुचिस्तानका मुख्यमन्त्रीका सञ्चार तथा राजनीतिक मामिलासम्बन्धी सल्लाहकार शाहिद रिन्डले सीमा बन्द गर्नुको उद्देश्य सुरक्षा सुदृढ बनाउनु, तस्करी नियन्त्रण गर्नु र सीमा प्रशासन व्यवस्थित बनाउनु रहेको बताए। उनले सामाजिक सञ्जालमा फैलिएका अपुष्ट खबरमा विश्वास नगर्न आग्रह गरे।
उनका अनुसार दुवै देशका उच्च अधिकारीहरू बाँकी प्रशासनिक समस्या समाधान गर्न वार्तामा छन्। अवैध तस्करी सञ्जाल नियन्त्रण गर्न समन्वित प्रणाली स्थापना गर्ने काम पनि भइरहेको उनले बताए। हालको प्रगतिका आधारमा सीमा चाँडै पुनः खुल्न सक्ने आशा उनले व्यक्त गरे।
