काठमाडौँ । पेसा इन्जिनियरिङ हो, तर लगन र मेहनतका कारण कुमार लामिछानेले अर्कै क्षेत्रमा पनि उदाहरणीय सफलता हासिल गरेका छन् — गाई तथा भैँसी पालनबाट उनले मासिक १५ लाख रुपैयाँसम्म बचत गरिरहेका छन् ।
गोरखाको सिरानचोक गाउँपालिका–७ खहरेका सिभिल इन्जिनियर लामिछानेले २०७७ साल जेठमा काठमाडौँको नागार्जुन नगरपालिका–६ रामकोट, डाँडापौवामा ‘क्षितिज एकीकृत कृषि फार्म प्रा.लि.’ स्थापना गरेका थिए । दस करोड रुपैयाँ लगानी गरेर मासिक एक लाखका दरले छ रोपनी जग्गा भाडामा लिई उनले फार्म सञ्चालन गरिरहेका हुन् ।
सुरुमा ३० भैँसीबाट थालेको व्यवसाय अहिले निकै फस्टाएको छ — गोठमा अहिले २०० गाई र ५० भैँसी छन् । फार्मबाट दैनिक एक हजार दुई सय लिटर दूध उत्पादन हुन्छ, जुन डिडिसी, नमुना डेरी र उपत्यकाका विभिन्न डेरीहरूमा बिक्री हुँदै आएको छ । गाईको दूध प्रतिलिटर १०० रुपैयाँ र भैँसीको १७० रुपैयाँमा बेचिन्छ, दुहुनका लागि मेसिन जडान गरिएको छ । फार्ममा प्रत्यक्ष तथा अप्रत्यक्ष गरी ५० जनाले रोजगारी पाएका छन् ।
दूध बिक्रीबाट मासिक ४५ देखि ५० लाख रुपैयाँ आम्दानी हुन्छ, तर पराल र दानामा हुने खर्च कटाएर करिब १५ लाख रुपैयाँ बचत हुने लामिछानेले बताए । सात वर्षदेखि इन्जिनियरिङ कामसँगै आफ्नी जीवनसाथी इन्जिनियर सङ्गीतासँगको सहकार्यमा यो व्यवसाय चलाइरहेको उनको भनाइ छ ।
