रुपन्देहीको बुटवलमा रहेको अन्तर्राष्ट्रिय सम्मेलन केन्द्रको स्वामित्व र सञ्चालनको जिम्मेवारी औपचारिक रूपमा विशिष्ट संरचना सञ्चालन तथा व्यवस्थापन विकास समितिलाई हस्तान्तरण गरिएको छ। बुटवलमा आयोजित कार्यक्रममा सहरी विकास तथा भवन निर्माण विभागका महानिर्देशक दिलिप भण्डारी र पूर्वाधार विकास मन्त्रीका सल्लाहकार मधु अर्यालको उपस्थितिमा हस्तान्तरण सम्पन्न भएको हो। सिनियर डिभिजनल इन्जिनियर किर्तिकान्त साहले गठन आदेश, २०८१ बमोजिम आवश्यक कागजातसहित संरचना समितिका कार्यकारी निर्देशक धर्मराज खड्कालाई बुझाएका हुन्।
जिम्मेवारी ग्रहण गर्दै खड्काले सभाहललाई पारदर्शी ढंगले सञ्चालन गर्ने, सेवाग्राहीको सन्तुष्टिलाई प्राथमिकतामा राख्ने र उपलब्ध स्रोतसाधनको अधिकतम उपयोग गर्ने प्रतिबद्धता जनाए। वर्तमान सरकारको भावना र गतिअनुसार संरचनाको भरपुर र व्यवस्थित सञ्चालन तथा व्यवस्थापनमा ध्यान दिने उनले बताए। उद्योग वाणिज्य संघ बुटवलका अध्यक्ष लोकनाथ पन्थीले निजी क्षेत्रले सम्मेलन केन्द्र सञ्चालनमा चासो देखाएको उल्लेख गर्दै सरकारले छिटो सञ्चालनको वातावरण बनाउनुपर्ने माग गरे।
आठ वर्ष लगाएर एक अर्ब ११ करोड रुपैयाँ खर्च गरी निर्माण गरिएको यो केन्द्र चार वर्षअघि उद्घाटन भएको थियो। तत्कालीन अर्थमन्त्री विष्णु पौडेलको योजनामा बुटवल–१० रामनगरस्थित बुटवल मण्डपमा बनेको र नेपालको झन्डाको आकारमा तयार भएको केन्द्रको उद्घाटन २०७९ भदौ ११ गते तत्कालीन प्रधानमन्त्री शेरबहादुर देउवा र पौडेलले गरेका थिए। तर १३ सभा हलमध्ये अहिले ठूलो हल मात्र आंशिक रूपमा चलेको छ भने बाँकी १२ हल प्रयोगमा आउन सकेका छैनन्। सञ्चालन कार्यविधि बन्न ढिला हुँदा केन्द्र व्यवस्थित रूपमा चल्न नसकेको र सरसफाइ, बिजुली, पानी, हेरालु तथा कर्मचारीमा लाखौँ रुपैयाँ खर्च भइरहेको छ। करिब साढे नौ बिघा क्षेत्रफलमा फैलिएको केन्द्रमा चार सय गाडी र चार सय मोटरसाइकल अटाउने पार्किङ, लिफ्ट सुविधा, ८७२ कुर्सी भएको मुख्य सभा हल, छ वटा बैठक हल र दुई बहुउद्देश्यीय हल छन्।
