नेपाल प्रिमियर लिगको नयाँ सिजनलाई लक्ष्य गर्दै लुम्बिनी लायन्सले विदेशी खेलाडी अनुबन्धलाई निरन्तरता दिएको छ । क्लबले बंगलादेशका ब्याटिङ अलराउन्डर शामीम हुसेनलाई टोलीमा भित्र्याएको हो ।
बायाँहाते आक्रामक ब्याटिङमा माहिर हुसेन आवश्यक पर्दा अफ स्पिन बलिङ गर्न पनि सक्छन् । यो दोहोरो क्षमताले लायन्सको ब्याटिङ क्रमलाई थप सन्तुलन दिने विश्वास गरिएको छ । टी–ट्वान्टी क्रिकेटमा छिटो रन बनाउन रुचाउने उनी लुम्बिनीको मध्यक्रममा भरपर्दो आधार बन्न सक्ने अपेक्षा छ ।
युवा क्रिकेटमा चम्किएर अघि बढेका हुसेन सन् २०२० मा आईसीसी यू–१९ विश्वकप जित्ने बंगलादेशी टोलीका सदस्य हुन् । त्यसपछि उनले राष्ट्रिय टोलीमा समेत स्थान बनाउँदै अन्तर्राष्ट्रिय स्तरमा आफ्नो पहिचान स्थापित गरेका छन् ।
बंगलादेशका लागि उनले सन् २०२१ मा जिम्बाब्वेविरुद्ध टी–२० अन्तर्राष्ट्रियमा डेब्यु गरेका थिए । डेब्यु शृङ्खलाको तेस्रो खेलमा उनले जम्मा १५ बलमा अविजित ३१ रन जोड्दै टोलीलाई जित दिलाउन निर्णायक भूमिका खेलेका थिए ।
लायन्सले यसअघि दक्षिण अफ्रिकी स्टार डेभिड मिलरलाई समेत टोलीमा भित्र्याइसकेको छ । यी विदेशी अनुबन्धसँगै आगामी एनपिएल सिजनमा लुम्बिनी प्रतियोगिताको बलियो दावेदारका रूपमा उभिएको छ ।
