नेपाल प्रिमियर लिग (एनपीएल) को तेस्रो संस्करणमा मंगलबार दुई खेल हुँदैछन्। कीर्तिपुरस्थित त्रिवि अन्तर्राष्ट्रिय क्रिकेट मैदानमा दिउँसो १२ः३० बजे विराटनगर किङ्स र चितवन राइनोज भिड्नेछन् भने दिउँसो ४ः३० बजे कर्णाली याक्स र जनकपुर बोल्ट्स आमनेसामने हुनेछन्। अघिल्लो संस्करणका नतिजाले दुवै खेललाई थप रोचक बनाएको छ।
दोस्रो संस्करणको लिग चरणमा चितवनले विराटनगरलाई ४८ रनले हराएको थियो। पहिले ब्याटिङ गरेको चितवनले २० ओभरमा पाँच विकेट गुमाएर १७४ रन बनाएको थियो। जवाफमा विराटनगर १६.५ ओभरमा १२६ रनमै समेटिएको थियो र १७५ रनको लक्ष्य भेट्टाउन सकेन। अनुभवी ब्याटर रवि बोपाराको लगातार तेस्रो अर्धशतक चितवनको जितमा निर्णायक बनेको थियो। लिग चरणमा विराटनगरले सात खेलबाट पाँच जित र दुई हारसहित १० अंक जोडेर दोस्रो स्थानमा रहँदै प्लेअफमा स्थान बनाएको थियो भने चितवन दुई जित र पाँच हारसहित चार अंकमा सातौँ स्थानमा सीमित भएको थियो।
दोस्रो खेलमा पनि अघिल्लो संस्करणको नतिजा सम्झनलायक छ। कर्णालीले पहिले ब्याटिङ गर्दै २० ओभरमा नौ विकेट गुमाएर १२९ रन बनाएको थियो। जवाफमा जनकपुरले २० ओभरमा सात विकेट गुमाएर १२६ रन मात्र बनाउन सक्यो र कर्णालीले तीन रनको साँघुरो अन्तरले जित हात पारेको थियो। अन्तिम ओभरसम्म प्रतिस्पर्धा कायम रहेको उक्त खेलमा जनकपुर लक्ष्यनजिक पुगेर पनि आवश्यक रन बनाउन सकेन। अघिल्लो संस्करणमा जनकपुरले सात खेलमा एक जित र छ हारसहित दुई अंक मात्र जोडेर पुछारमा रह्यो भने कर्णाली दुई जित र पाँच हारसहित चार अंकमा छैटौँ स्थानमा थियो। यसपटक विराटनगर पुरानो हारको बदला लिन चाहन्छ भने चितवन पुरानै सफलता दोहोर्याउन चाहन्छ। त्यस्तै जनकपुर कर्णालीसँगको हारको बदला लिने र कर्णाली जितको लय कायम राख्ने लक्ष्यमा हुनेछन्।
