नेपाली कांग्रेसको शेरबहादुर देउवा समूहले १५ औं महाधिवेशनअन्तर्गत दाङ र प्यूठानमा सर्वसम्मत रूपमा नयाँ जिल्ला नेतृत्व चयन गरेको छ। दुवै जिल्लामा सोमबार सम्पन्न अधिवेशनबाट नयाँ कार्यसमिति बनेको हो।
दाङको घोराहीमा भएको अधिवेशनबाट जिल्ला सभापतिमा गोपालराज शर्मा सर्वसम्मत चयन भएका छन्। शर्मा यसअघि जिल्ला सहसचिव थिए। उनी हाल देउवा समूहका लुम्बिनी प्रदेश संयोजकसमेत रहेका छन्। उपसभापतिमा सुरेन्द्रबहादुर खड्का र भगवानदास यादव चयन भएका छन्। सचिवमा पूर्ण मल्ल र गेहेन्द्र वली तथा सहसचिवमा रामबहादुर केसी र अनिता विक सर्वसम्मत भएका छन्। अधिवेशनले २७ जना जिल्ला सदस्य पनि चयन गरेको छ।
अधिवेशनको उद्घाटन लुम्बिनी प्रदेश संयोजक गेहेन्द्र गिरीले गरेका थिए। उद्घाटनअघि घोराहीमा पञ्चेबाजासहित र्याली निकालिएको थियो।
प्यूठानमा जिल्ला सभापतिमा देवेन्द्र बर्मा चयन भएका छन्। बर्मा प्यूठानको उपमेयर हुन् र यसअघि पत्रकारिता गरेका थिए। उपसभापतिमा देविराम पुन र प्रमोद पोखरेल, सचिवमा कुमार श्रेष्ठ र दीपक केसी तथा सहसचिवमा गंगालाल विष्ट र माधव केसी सर्वसम्मत भएका छन्। अधिवेशनले ३७ सदस्यीय कार्यसमिति चयन गरेको छ। प्रदेश (क) को सभापतिमा गोपाल थापा र प्रदेश (ख) को सभापतिमा नेत्रबहादुर केसी चयन भएका छन्।
लुम्बिनी प्रदेशका १२ जिल्लामध्ये हालसम्म चार जिल्लाको अधिवेशन सकिएको संयोजक गिरीले बताए। दाङ, रोल्पा, प्यूठान र कपिलवस्तुको अधिवेशन सम्पन्न भइसकेको छ। रोल्पामा मानबहादुर खत्री र कपिलवस्तुमा राजेशबहादुर सिंह सभापति भएका छन्।
गिरीका अनुसार कात्तिक १८ गते अर्घाखाँची, १९ गते बाँके र २० गते बर्दियाको अधिवेशन तय भएको छ। बाँकी जिल्लामा तिहारपछि अधिवेशन हुने उनले बताए।
