जय नेपाल पार्टीले संविधान संशोधनसहितको आठ बुँदे संकल्प सार्वजनिक गर्दै माग सम्बोधन नभए चरणबद्ध रूपमा आन्दोलनका कार्यक्रम सञ्चालन गर्ने चेतावनी दिएको छ ।
सभापति धवलशम्सेर राणाले मंगलबार विज्ञप्ति जारी गर्दै राष्ट्रियता, प्रजातन्त्र, संवैधानिक राजसंस्था र धार्मिक पहिचानजस्ता विषयलाई संविधान संशोधनको प्राथमिकतामा राख्नुपर्ने बताएका छन् । उनले भनेका छन्, ‘प्रस्तुत प्राथमिकताहरू राज्यले बेलैमा सम्बोधन नगरे, चरणबद्ध रूपमा शान्तिपूर्ण आन्दोलनका गतिविधिहरू सञ्चालन गर्ने प्रण हामीले गरेका छौँ ।’
पार्टीले बालेन शाह नेतृत्वको सरकारले सुशासन, समृद्धि र भ्रष्टाचार नियन्त्रणका लागि विश्वसनीय आधार निर्माण गर्न नसकेको आरोप लगाएको छ । जेनजी विद्रोहका क्रममा ज्यान गुमाएका युवा, सुरक्षाकर्मी तथा अन्य नागरिकलाई न्याय दिन नसकेको र सरकारी संरचनामा आगजनी गर्ने दोषीलाई कानुनी दायरामा ल्याउन नसकेको भन्दै सरकारको आलोचना गरिएको छ ।
भोटेकोशी–त्रिशूली बाढीबाट प्रभावित क्षेत्रमा प्राप्त राहत सामग्री तथा रकमको विवरण सार्वजनिक गर्न पनि पार्टीले माग गरेको छ । प्रधानमन्त्री विपद् राहत कोषमा संकलित रकम कहाँ र कसरी खर्च गरियो भन्ने अद्यावधिक विवरण सार्वजनिक गर्न तथा पुनर्स्थापना र पुनर्निर्माणको प्रगतिबारे जानकारी गराउन सरकारको ध्यानाकर्षण गराइएको छ ।
बजारमा दैनिक उपभोग्य वस्तुको मूल्य दोब्बर–तेब्बर वृद्धि भएको, जनताको दैनिकी कष्टकर बनेको र सञ्चारकर्मीसहित नागरिकलाई विनापुर्जी पक्राउ गर्ने क्रम बढेको भन्दै पार्टीले आपत्ति जनाएको छ । यस्ता गतिविधिले कानुनी राज्य र लोकतान्त्रिक मूल्यको उल्लंघन गरेको विज्ञप्तिमा उल्लेख छ ।
संकल्पमा सुदृढ राष्ट्रियता र सार्थक प्रजातन्त्रका लागि संविधान संशोधन, संवैधानिक राजसंस्थासहित हिन्दु, बौद्ध र किरातलगायतको सनातन हिन्दु अधिराज्य, धर्मान्तरण, गौहत्या र गाईको मासु बिक्रीमा प्रतिबन्ध, युवा तथा महिलामैत्री आर्थिक विकास र प्रविधिमा आधारित समुन्नत नेपाल, अधिकारसम्पन्न स्थानीय निकाय र प्रदेश संरचनाबारे जनमत संग्रह तथा एक पटकको नेपाली, सधैँका लागि नेपाली भन्ने मान्यतासहित मताधिकारको सुनिश्चितता समेटिएको छ ।
