काठमाडौं । नेपाली कम्युनिस्ट पार्टीका सह–संयोजक माधवकुमार नेपालले बृहत्तर कम्युनिस्ट एकता र ध्रुवीकरणमा आउन आह्वान गरेका छन् । मंगलबार पार्टी कार्यालय पेरिसडाँडामा आयोजित पार्टी एकता कार्यक्रममा उनले कम्युनिस्ट आन्दोलनप्रतिको आकर्षण बढ्दै गएको भन्दै त्यसलाई अझ बलियो बनाउन सबैलाई एकतामा आउन आग्रह गरे ।
सह–संयोजक नेपालले अहिलेको परिस्थितिमा आन्दोलनप्रतिको आकर्षण बढाउँदै लैजानुपर्ने भएकाले पार्टी एकीकरणको समायोजनको कामलाई तीव्रताका साथ अघि बढाइने बताए । उनले पार्टी एकताको प्रक्रियालाई छिटो टुंग्याएर संगठनलाई बलियो बनाउने दिशामा अघि बढ्नुपर्नेमा जोड दिए ।
उनले जेठभित्र स्थानीय तहको निर्वाचन र सँगसँगै प्रदेश तहको निर्वाचन हुने सम्भावना रहेकाले त्यसको तयारीमा जुट्न पनि आग्रह गरे । निर्वाचनको तयारीसँगै संगठन विस्तारलाई प्राथमिकता दिनुपर्ने उनको भनाइ थियो ।
नेपालले पालिका तह र वडा तहमा अधिवेशन गरेर जनता र स्थानीय कार्यकर्ताको परिचालन गर्ने तथा पार्टीलाई तलबाट सुदृढ बनाउने योजना बनाइएको जानकारी दिए । उनका अनुसार तल्लो तहबाटै संगठन बलियो बनाएपछि मात्र पार्टी राष्ट्रिय रूपमा प्रभावकारी बन्न सक्छ ।
उनले स्थानीय चुनावलाई मध्यनजर गर्दै महाधिवेशन चुनावपछि सार्ने योजना बनाइएको भन्दै यसबीचमा पार्टी संगठनलाई बलियो बनाउनुपर्नेमा जोड दिए ।
