डोल्पा कारागारबाट सुरुङ खनेर आठ जना कैदीबन्दी भागेको घटनाको अवस्था बुझ्न कर्णाली प्रदेश प्रहरी कार्यालयका प्रमुख डीआईजी जयराज सापकोटा डोल्पातर्फ लागेका छन्। उनी मंगलबार बिहानै वीरेन्द्रनगरबाट भेरी कोरिडोर हुँदै डोल्पा प्रस्थान गरेका हुन्।
शुक्रबार राति डोल्पा कारागारबाट आठ जना कैदीबन्दीले सुरुङ खनेर भागेका थिए। कारागारमा १५ जनाको सुरक्षा ड्युटी रहेका बेला पनि भाग्ने घटना थाहा नपाइएपछि सुरक्षा प्रणालीमाथि गम्भीर प्रश्न उठेको छ।
घटनाबारे बुझ्न जिल्ला तहबाट अध्ययन टोली खटिएको छ भने प्रहरी मुख्यालयबाट पनि मंगलबार नै एउटा टोली अनुसन्धानका लागि डोल्पा पुगेको छ।
भागेका कैदीबन्दीको खोजी जारी छ। सुरक्षाकर्मीको निगरानीमा रहेका बेला सुरुङ खनेर भाग्न सफल भएको घटनाले कारागारको सुरक्षा व्यवस्थामा देखिएको कमजोरी उजागर गरेको छ। घटनाको छानबिनपछि मात्र जिम्मेवारी र कमजोरीको यकिन विवरण आउने अपेक्षा गरिएको छ।
