नेपाल सरकारले मलेसिया जाने नेपाली श्रमिकको छनोट र भर्ना प्रक्रियामा देखिएका विषयमा छलफल गर्न काठमाडौँमा संयुक्त कार्यदलको बैठक बस्ने प्रस्ताव अघि सारेको छ। परराष्ट्र मन्त्रालयमार्फत युवा, श्रम तथा रोजगार मन्त्रालयले मलेसियाली पक्षलाई औपचारिक पत्र पठाउँदै बैठकको प्रस्ताव गरेको हो।
दुई देशबीच श्रमिक भर्ना प्रक्रियामा उठेका समस्या आपसी कुराकानी र सहकार्यबाट टुंग्याउने उद्देश्यले यो कूटनीतिक पहल गरिएको हो। बैठकमा भर्ना प्रक्रियामा प्रयोग हुँदै आएको एफडब्लुसीएमएस प्रणालीसँग जोडिएका विषयका साथै श्रम आप्रवासन क्षेत्रका अन्य सवालमा पनि छलफल हुने बताइएको छ।
नेपालले बैठकका लागि सन् २०२६ नोभेम्बर १८ र १९ वा डिसेम्बर २ र ३ गतेको मिति सुझाएको छ। मलेसियाली पक्षलाई सहज हुने मितिमा अन्तिम बैठक तय गर्न सकिने नेपालको भनाइ छ।
भर्ना प्रक्रियामा निरन्तरता, पूर्वानुमानयोग्यता र सहजता जोगाइराख्न दुवै देशको आपसी सहमतिमा नयाँ व्यवस्था नबन्दासम्म अहिलेको प्रक्रियालाई नै निरन्तरता दिनुपर्ने नेपालको धारणा छ। बैठकमा श्रमिक छनोट र भर्ना प्रक्रियालाई अझ व्यवस्थित, पारदर्शी र श्रमिकमैत्री बनाउने विषयमा छलफल हुने अपेक्षा गरिएको छ।
यसैगरी सन् २०१८ मा नेपाल र मलेसियाबीच भएको श्रमसम्बन्धी समझदारीपत्र नवीकरणका लागि तयार पारिएको मस्यौदालाई अन्तिम रूप दिने विषय पनि बैठकको प्रमुख एजेन्डामा रहनेछ। नेपाल सरकारले नेपाली श्रमिकको हित संरक्षण, सुरक्षित तथा मर्यादित वैदेशिक रोजगारीको प्रवर्द्धन र दुवै देशको साझा हितअनुकूल श्रम सम्बन्धलाई थप बलियो बनाउने प्रतिबद्धता दोहोर्याएको छ। प्रस्तावित बैठकले भर्ना प्रक्रियाका समस्या समाधान गर्न र नेपाल–मलेसिया श्रम सहकार्यलाई अझ प्रभावकारी बनाउन सहयोग पुग्ने अपेक्षा गरिएको छ।
