काठमाडौं — कीर्तिपुर नगरपालिका–६ स्थित चोभारडाँडाको आदिनाथ मन्दिरमा यस वर्ष पनि एक महिने मेला लाग्ने भएको छ। आश्विन शुक्ल पूर्णिमादेखि कात्तिक शुक्ल पूर्णिमासम्म सञ्चालन हुने मेला आगामी कात्तिक ९ गतेबाट सुरु हुनेछ।
मेलाको तयारीस्वरूप मन्दिर परिसर र वरपरका क्षेत्रमा सरसफाइ तथा सजावटको काम तीव्र गतिमा भइरहेको छ। मेला व्यवस्थापन समितिको आयोजनामा भइरहेको तयारीमा स्थानीय सङ्घ–संस्थाहरूले पनि समन्वय र सहयोग गरिरहेका छन्। अहिले मन्दिरलाई आकर्षक ढंगले सिँगारिएको छ।
मन्दिरमा शिव र पार्वतीको संयुक्त आकार प्रतिबिम्बित गर्ने मूर्ति रहेकाले यसलाई आदिनाथका साथै अर्धनारेश्वर पनि भन्ने चलन छ। परिवारमा सुख–समृद्धि प्राप्त हुने र भय, रोग तथा विघ्नबाट मुक्ति मिल्ने विश्वासका साथ भक्तजन यो मेलामा सहभागी हुने गर्छन्।
आदिनाथ हिन्दु र बौद्ध दुवै अनुयायीका लागि आस्थाको साझा केन्द्र हो। हिन्दु धर्मावलम्बीले यसलाई शिव–शक्तिको प्रतीक मानेर पूजा गर्छन् भने बौद्ध अनुयायीहरू लोकेश्वर तथा करुणाका प्रतीकका रूपमा आदिनाथको उपासना गर्छन्।
मेला व्यवस्थापन समितिले यस वर्षको मेलामा करिब दुई लाख भक्तजन सहभागी हुने अनुमान गरेको छ।
