काठमाडौं — अर्थमन्त्री डा. स्वर्णिम वाग्लेले नेपालको जेनजी आन्दोलनलाई अराजकताको बाटोमा जान नदिई लोकतान्त्रिक प्रक्रियाबाटै टुंग्याइएको दाबी गरेका छन् । भारतको नयाँदिल्लीमा आयोजित एनडीटीभी वर्ल्ड समिट २०२६ को ‘सडकको विद्रोहदेखि सत्तासम्म’ शीर्षकको सत्रमा बोल्दै उनले सडकको असन्तुष्टि शान्तिपूर्ण निर्वाचनमार्फत सत्ताको नेतृत्वमा परिणत भएको बताए ।
उनका अनुसार नेपाल दक्षिण एसियाकै सबैभन्दा युवा जनसंख्या भएको मुलुक हो, जहाँ आधाभन्दा बढी नागरिक ३० वर्षमुनिका छन् । स्मार्टफोन र सामाजिक सञ्जालसँगै हुर्किएको नयाँ पुस्ता परम्परागत राजनीतिक प्रणालीप्रति गहिरो रुष्ट थियो । सामाजिक सञ्जाल प्रतिबन्धको विषयमा भएको प्रदर्शनमा १९ जना युवाको ज्यान गएपछि पुरानो सत्ता ढलेको उनले स्मरण गरे ।
आन्दोलनपछिको ६ महिने सङ्क्रमणकाल पूर्वप्रधानन्यायाधीश नेतृत्वको सरकारले सम्हालेको र त्यसले नेपालकै इतिहासमा सबैभन्दा शान्तिपूर्ण निर्वाचन गराएको उनको दाबी छ । रास्वपा अध्यक्ष रवि लामिछाने र प्रधानमन्त्रीका उम्मेदवार बालेन शाहबीचको गठबन्धनले विकल्प खोजिरहेका जनतामा ‘इलेक्ट्रिक कम्बिनेसन’ जस्तो ऊर्जा पैदा गरेको पनि उनले बताए । अहिले तल्लो सदनमा पार्टीसँग झन्डै दुई-तिहाइ बहुमत रहेको र संघीय सरकारका १७ वटा मन्त्रालयको नेतृत्व रास्वपाले गरिरहेको जानकारी उनले दिए ।
छ महिनाको अवधिमा सरकारमा भ्रष्टाचारको कुनै दाग नलागेको दाबी गर्दै वाग्लेले विश्वभरका युवा पुस्तालाई सुझाव दिए — जतिसुकै असन्तुष्टि भए पनि परिवर्तनको अन्तिम कसी शान्तिपूर्ण मतदान नै हो ।
