नेपाल प्रिमियर लिग (एनपीएल) अन्तर्गत आज कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा दुई खेल खेलिँदैछन्। दुवै खेल अंक तालिकाको समीकरणमा प्रत्यक्ष प्रभाव पार्ने भएकाले चारवटै टोलीका लागि जित अपरिहार्य जस्तै बनेको छ।
दिनको पहिलो खेल दिउँसो १२ः३० बजे सुदूरपश्चिम रोयल्स र कर्णाली याक्सबीच हुनेछ। चार खेल खेलेको सुदूरपश्चिमले दुई जित र दुई हार बेहोरेको छ। पाँचौँ खेल खेल्न लागेको रोयल्सलाई प्लेअफको दौड बलियो बनाउन आजको खेल जित्नैपर्ने दबाब छ।
यता तीन खेल खेलेको कर्णाली याक्सले एक जित र दुई हार बेहोर्दै चार अंक जोडेको छ। चौथो खेल खेल्न लागेको याक्स पनि जित निकाल्दै तालिकामा आफ्नो स्थान सुधार्ने योजनामा छ।
आजै साँझ ५ बजे हुने दोस्रो खेलमा चितवन राइनोज र पोखरा एभेन्जर्स आमनेसामने हुनेछन्। तीन खेल खेलेको चितवनले एक जित, एक हार र एक खेलमा अंक बाँडेको छ। तीन अंकसहित तालिकाको पुछारबाट तेस्रो स्थानमा रहेको राइनोजलाई पनि आजको खेल उत्तिकै महत्त्वपूर्ण छ।
अर्कोतर्फ पोखरा एभेन्जर्स भने प्रतियोगितामा पहिलो जितको खोजीमा छ। यसअघि खेलेका खेलमा अपेक्षित नतिजा निकाल्न नसकेको एभेन्जर्स आज चितवनलाई हराउँदै जितको खाता खोल्ने लक्ष्यमा हुनेछ।
