अस्ट्रेलियाको ताजमानिया राज्यस्थित बर्नी सहरमा नेपाली समुदायले आफ्नो भाषा र संस्कृति जोगाउने एउटा सुन्दर अभ्यास थालेको छ। त्यहाँको गाइड्स हलमा हरेक दुई सातामा नेपाली पाठशाला चल्छ, जहाँ साँझ दुई घण्टा बालबालिकालाई नेपाली भाषा पढाइन्छ।
कक्षामा बालबालिकाले नेपाली अक्षर चिन्ने र लेख्ने अभ्यास गर्छन्। पढाइ सकिएपछि त्यही हलमा दुई घण्टा भजनकीर्तन हुन्छ। छोराछोरीलाई पढ्न लिएर आएका अभिभावक भजनमा सहभागी हुन्छन्, र बालबालिका पनि उनीहरूसँगै रमाउँछन्। कोही मादल बजाउँछन्, कोही खैंजडी र मञ्जिरा समात्छन्, कोही नाच्छन् त कोही भाका हालेर गाउन सिक्छन्।
यो पाठशाला बर्नी नेप्लिज कम्युनिटीले सुरु गरेको हो। संस्थाका निवर्तमान सचिव मदन सुवेदीका अनुसार ताजमानियामा नेपाली समुदायका करिब ४२ बालबालिका छन्, जसमध्ये २२ देखि २५ जना नियमित रूपमा कक्षामा आउँछन्। पाठशाला सुरु भएको पाँच महिना भयो।
बर्नीमा दसैं सामूहिक रूपमा मनाइन्छ। यसपटक फूलपातीका दिन आयोजित विशेष सांस्कृतिक कार्यक्रममा तीन सयभन्दा धेरै मानिस सहभागी भए, जसमध्ये करिब ८० प्रतिशत नेपाली थिए। लाखे नाच र पञ्चेबाजा जस्ता प्रस्तुति पनि हुन्छन्।
संस्थाले नयाँ आउने नेपालीलाई काम र कोठा खोज्न सहयोग गर्छ, आवश्यकता परे आफ्नै घरमा राखेर समेत साथ दिन्छ। ताजमानियामा करिब १८० नेपाली परिवार छन्, जसमध्ये करिब २० परिवारले घर किनिसकेका छन्। बर्नी नेप्लिज कम्युनिटी एक वर्षअघि दर्ता भएको हो र अहिले यसका अध्यक्ष नितेश सुवेदी छन्।
