चितवन । पृथ्वी राजमार्गको कुरिनटार खण्डमा मंगलबार बिहान तीनवटा सवारीसाधन एकआपसमा ठोक्किँदा ११ जना घाइते भएका छन्। दुर्घटना बिहान ८:४५ बजे इच्छाकामना गाउँपालिका–४ को धारापानीमा भएको हो।
सरलाहीबाट काठमाडौंतर्फ जाँदै गरेको बस (बाग्मती प्रदेश ०३-००१ ख २७७७), काठमाडौंबाट मुग्लिनतर्फ गइरहेको ट्रक (प्रदेश १-०२-००२ ख ०६१६) र बुटवलबाट काठमाडौं आउँदै गरेको माइक्रोबस (बाग्मती प्रदेश ०३-००१ ज १२५९) एकआपसमा जुधेका थिए। दुर्घटनामा परी घाइते भएका ११ जनालाई स्थानीय अस्पताल तथा कुरिनटारस्थित सशस्त्र प्रहरी बलको ट्रमा सेन्टरमा उपचारका लागि लगिएको छ। घाइतेहरूको अवस्थाबारे विस्तृत जानकारी आउन बाँकी छ।
दुर्घटनापछि सडक पूर्ण रूपमा अवरुद्ध भएको थियो। कुरिनटारस्थित सशस्त्र प्रहरी बल नेपाल विपद् व्यवस्थापन तालिम शिक्षालयबाट ६६ जनाको टोली घटनास्थलमा खटिएको सशस्त्र प्रहरी बलका सहप्रवक्ता प्रहरी नायब उपरीक्षक शैलेन्द्र थापाले जानकारी दिए। दुर्घटनाबारे थप विवरण आउन बाँकी रहेको उनले बताए।
