आन्ताल्या । संयुक्त राष्ट्रसङ्घीय जलवायु सम्मेलन कोप–३१ का अवसरमा परराष्ट्रमन्त्री शिशिर खनाल र इथियोपियाका विदेशमन्त्री गेडियन टिमोथियोसबीच सोमबार द्विपक्षीय भेटवार्ता भएको छ।
भेटका क्रममा परराष्ट्रमन्त्री खनालले जलवायु परिवर्तनका कारण नेपालमा हालै भएका विनाशकारी विपद्पछि इथियोपिया सरकार र त्यहाँका जनताले देखाएको सहानुभूति र ऐक्यबद्धताप्रति हार्दिक आभार व्यक्त गरे।
समानता, साझा वातावरणीय दायित्व र बहुपक्षीय साझेदारीमा आधारित विश्वव्यापी जलवायु कार्यलाई कोप–३१ तथा इथियोपियाको आगामी कोप अध्यक्षताका क्रममा अघि बढाउन नेपाल प्रतिबद्ध रहेको उनले बताए।
भेटमा दुई देशबीचको मैत्रीपूर्ण र सहयोगात्मक सम्बन्धलाई थप सुदृढ बनाउने विषयमा पनि कुराकानी भयो। जलवायु परिवर्तन, अतिकम विकसित मुलुकबाट स्तरोन्नति, व्यापार, हवाई सम्पर्क विस्तार, पर्यटन तथा जनस्तरको सम्बन्ध अभिवृद्धिलगायत आपसी हितका विविध विषयमा छलफल भएको थियो।
