अमेरिकी सेनाका वरिष्ठ जनरलले युक्रेन र इरान युद्धसम्बन्धी गोप्य जानकारी पत्रकारहरूलाई दिएको स्वीकार गरेका छन्। ती जनरललाई रक्षामन्त्री पिट हेगसेथले पदबाट हटाएका छन्। आन्तरिक छानबिन प्रतिवेदनका आधारमा यो विवरण सार्वजनिक भएको हो।
बर्खास्तमा परेका लेफ्टिनेन्ट जनरल ब्रेट सिल्भिया अमेरिकी संयुक्त सैन्य नेतृत्व (ज्वाइन्ट स्टाफ) को रणनीति, योजना तथा नीति निर्देशनालय (जे–५) का प्रमुख थिए। उनले झन्डै एक वर्षको अवधिमा दुई फरक सञ्चारमाध्यमका पत्रकारहरूलाई वर्गीकृत जानकारी दिएको प्रतिवेदनमा उल्लेख छ। पेन्टागनले उनको बर्खास्तीलाई ‘गम्भीर अनुशासनहीनता’ भनेको छ।
प्रतिवेदनअनुसार जानकारी चुहावट सन् २०२५ को जुनदेखि सुरु भएको थियो। सिल्भियाले इन्क्रिप्टेड मेसेजिङ एप सिग्नलमार्फत पत्रकारहरूसँग सम्पर्क राखेका थिए र भर्जिनियाको आर्लिङ्टनस्थित एउटा रेस्टुरेन्टमा एक पत्रकारसँग प्रत्यक्ष भेटसमेत गरेका थिए। ती पत्रकारको पेन्टागन प्रवेश अनुमति खारेज भइसकेपछि उक्त भेट भएको थियो। भेटका क्रममा उनले वर्गीकृत प्रतिवेदन हेर्दा टिपेका नोटका आधारमा युक्रेनलाई अमेरिकी सहयोगबारे मौखिक रूपमा जानकारी दिएको बताइएको छ।
जुन वा जुलाईतिर आएको एउटा सिग्नल सन्देश इरानसँग सम्बन्धित रहेको उनको अनुमान छ, तर त्यसको व्यहोरा आफूले सम्झन नसकेको र कुराकानी गल्तीले मेटिएको उनले बताएका छन्। अनुसन्धानका क्रममा चार पटकसम्म पोलिग्राफ परीक्षणमा असफल भएपछि भिडियोमा रेकर्ड गरिएको बयानमा उनले चुहावट स्वीकार गरेका थिए।
सिल्भियाले आफ्ना भेटघाटबारे पेन्टागनको सार्वजनिक मामिला शाखासँग समन्वय गरेका थिएनन् र जानकारी दिनुअघि अनुमति पनि लिएका थिएनन्। उनको मुद्दा थप कारबाहीका लागि न्याय विभागमा पठाइएको छ। पेन्टागनले वर्गीकृत जानकारीको अनधिकृत खुलासाप्रति कुनै सहनशीलता नरहेको जनाएको छ। सिल्भियाले यसअघि अमेरिकी सेनाको १०१औँ एयरबोर्न डिभिजनको कमान्ड सम्हालेका थिए।
