काठमाडौँ । नेपाल प्रिमियर लिगमा लुम्बिनी लायन्समाथि ३६ रनको जित निकालेपछि काठमाडौँ गोर्खाजका पाकिस्तानी तीव्र गतिका बलर जहाँदाद खानले टोलीको एक मात्र लक्ष्य उपाधि भएको बताएका छन् । खेलपछि भएको पत्रकार सम्मेलनमा उनले टोलीको प्रदर्शनप्रति सन्तोष व्यक्त गर्दै व्यक्तिगत कीर्तिमानभन्दा टोलीको सफलतालाई माथि राखेको बताए ।
कीर्तिपुरको त्रिवि मैदानमा १६० रन राम्रो योगफल भएको उनको ठम्याइ छ । उनका अनुसार मैदान र खेलको परिस्थिति हेर्दा त्यो स्कोर पर्याप्त थियो र बलिङ गर्दा मैदानबाट राम्रो सहयोग पनि मिलिरहेको थियो । टोलीले बनाएको योजना अनुसार नै बलिङ भएकाले जित सम्भव भएको उनले बताए ।
अघिल्लो खेलमा ब्याटबाट गरेको राम्रो प्रदर्शनले आफ्नो आत्मविश्वास बढाएको पनि उनले सुनाए । यसअघिका खेलमा सोचेजस्तो स्विङ पाउन नसकेको तर पछिल्लो रातको खेलमा हावामा बल राम्रोसँग स्विङ भएकाले योजना कार्यान्वयन गर्न सजिलो भएको उनको भनाइ थियो ।
नेपालमा खेल्दाको अनुभव सुखद रहेको बताउँदै उनले नेपाली दर्शकको समर्थन र मैदानको वातावरणबाट आफू प्रभावित भएको उल्लेख गरे । कप्तान करण केसीसँग बलिङ साझेदारी गर्न पाउँदा खुसी लागेको बताउँदै उनले करणलाई उत्कृष्ट तीव्र गतिका बलरका रूपमा प्रशंसा गरे ।
पाकिस्तान क्रिकेट बोर्डबाट अनापत्ति पत्र लिने क्रममा भएको झन्झट र टोलीले आफूमाथि गरेको भरोसाबारे सोधिएको प्रश्नमा उनले आफूमाथि कुनै दबाब नरहेको स्पष्ट पारे । टोलीले पूर्ण साथ दिएको र आफ्नो स्वाभाविक खेल खेल्दै उत्कृष्ट प्रदर्शन गर्न मात्र भनेको उनले बताए ।
प्लेअफमा पुगेर मात्र सन्तुष्ट नहुने बताउँदै जहाँदादले शीर्ष स्थान हासिल गर्दै एनपिएलको ट्रफी उचाल्ने टोलीको चाहना रहेको बताए ।
