मुम्बईको जुहू क्षेत्रमा अभिनेता टाइगर श्राफको गाडीमाथि भएको गोली प्रहारको घटनामा प्रहरीले तीन राज्यबाट १० जनालाई नियन्त्रणमा लिएको छ। मुम्बई प्रहरीले राजस्थान, उत्तर प्रदेश र हरियाणाबाट ती सन्दिग्धहरूलाई समातेको हो। उनीहरूसँग सोधपुछ गर्दै घटनाको थप अनुसन्धान भइरहेको प्रहरीले जनाएको छ।
यसैबीच टाइगर श्राफको टोलीले अभिनेताले मुम्बई प्रहरीको क्राइम ब्रान्चसमक्ष आफू मानसिक आघातमा रहेको बताएको भन्ने सञ्चारमाध्यमका दाबीलाई पूर्ण रूपमा अस्वीकार गरेको छ। टाइगरका प्रवक्ताले अभिनेताले त्यस्तो कुनै बयान नदिएको स्पष्ट पारेका छन्। केही सञ्चारमाध्यमले स्रोतलाई उद्धृत गर्दै टाइगरले आफूमाथि ज्यानै लिने प्रयास कसले र किन गर्न चाहन्छ भनी बताएको दाबी गरेका थिए। प्रवक्ताले उक्त खबर पूर्ण रूपमा झूटो भएको बताएका छन्।
यसअघि टाइगरको टोलीले सामाजिक सञ्जालमा फैलिइरहेका भ्रमपूर्ण दाबी, कृत्रिम बुद्धिमत्ताबाट निर्मित भिडियो र कपोलकल्पित कथाबाट जोगिन सर्वसाधारणलाई आग्रह गरेको थियो। टोलीले टाइगर र उनको आधिकारिक टोलीबाट आउने जानकारीमा मात्र विश्वास गर्न अनुरोध गर्दै गलत समाचार र कृत्रिम सामग्री फैलाउनेहरूविरुद्ध कानुनी कारबाही गरिने चेतावनी दिएको छ।
टोलीका अनुसार सञ्चारमाध्यम, डिजिटल प्लेटफर्म र सामाजिक सञ्जालका पेजहरूले कुनै पनि सूचना प्रकाशित गर्नुअघि त्यसको पुष्टि गर्नुपर्छ। भ्युज वा आर्थिक लाभका लागि गलत सूचना बनाउन वा फैलाउन नहुनेमा टोलीले जोड दिएको छ।
गत अक्टोबर १८ मा मुम्बईको जुहूस्थित फुटबल मैदानबाट बाहिरिने क्रममा टाइगर श्राफको गाडीमाथि गोली प्रहार भएको थियो। दुई जना आक्रमणकारीले ५ देखि ७ राउन्ड गोली चलाएका थिए। त्यस क्रममा चालकलाई गोली लागेको थियो र टाइगर आफैँले गाडी चलाएर सिधै अस्पताल पुगेका थिए।
