रौतहटको सदरमुकाम गौरमा मंगलबार राति एक युवकमाथि गोली प्रहार भएको छ। गौर नगरपालिका–४ गढवाका राकेश कुमार यादवमाथि अज्ञात व्यक्तिले पाँच राउन्ड गोली हानेको प्रहरीले जनाएको छ।
स्थानीय बासिन्दाका अनुसार राति करिब ९ः१५ बजे गढवा गाउँस्थित पानी ट्यांकी नजिक यादवमाथि एक्कासि गोली चलाइएको थियो। गोली लागेर उनी गम्भीर घाइते भएका छन्। घटनापछि त्यहाँ त्रास फैलिएको थियो। घाइतेलाई तत्कालै अस्पताल पुर्याइएको थियो।
जिल्ला प्रहरी कार्यालय रौतहटका प्रवक्ता एवं प्रहरी नायब उपरीक्षक वसन्त गौतमका अनुसार घाइते यादवको वीरगञ्जस्थित बयोधा अस्पतालमा उपचार भइरहेको छ। सिटी स्क्यान गर्दा उनको पिठ्युँमा दुई र हातमा एक गरी तीनवटा गोली लागेको देखिएको छ। हात, पाखुरा र पिठ्युँलगायत शरीरका विभिन्न भागमा गोलीका घाउ देखिएको प्रहरीले जनाएको छ।
घाइतेको अवस्था गम्भीर रहे पनि उनी चिकित्सकसँग कुराकानी गर्न सक्ने अवस्थामा रहेको प्रहरीको भनाइ छ।
युवकमाथि कसले र किन गोली हान्यो भन्ने विषयमा हालसम्म केही खुल्न सकेको छैन। घटनाको जानकारी पाउनासाथ जिल्ला प्रहरी कार्यालयबाट प्रहरी टोली घटनास्थल पुगेको थियो। प्रहरीले घटनाको अनुसन्धान तथा सम्भावित आक्रमणकारीको खोजी सुरु गरेको छ।
सदरमुकामकै बस्तीमा रातिको समयमा भएको यो घटनाले स्थानीय बासिन्दामा सुरक्षा चिन्ता बढाएको छ। पाँच राउन्ड गोली हान्ने व्यक्ति वा समूहको पहिचान र घटनाको वास्तविक कारण पत्ता लगाउनु प्रहरीका लागि चुनौती बनेको छ। घटनाबारे थप अनुसन्धान भइरहेको प्रहरीले जनाएको छ।
