हुम्ला — नेपाल टेलिकमको रिले टावरमा खराबी आएपछि मुगु र हुम्लाका चार स्थानीय तहका बासिन्दा सञ्चार सेवाबाट वञ्चित भएका छन्। मुगुको सोरु गाउँपालिका–१ नाथर्पुमा रहेको टावरमा समस्या देखिएपछि हुम्लाका चंखेली, सर्केगाड र अदानचुली तथा मुगुको सोरु गाउँपालिकाका सेवाग्राही प्रभावित भएका हुन्।
उक्त टावर गत १ कात्तिकदेखि बिग्रिएको थियो। मर्मतपछि सेवा सुचारु भए पनि पाँच दिनमै फेरि समस्या दोहोरिएपछि चारवटै पालिकाका बासिन्दा फेरि सञ्चारविहीन भएका छन्। पटकपटक टावर बिग्रिँदा स्थानीयवासीले सास्ती भोग्नुपरेको छ।
चंखेली गाउँपालिकाकी उपाध्यक्ष प्रेमकला शाहीले नेटवर्कमा बारम्बार समस्या आउँदा नागरिकको गुनासो बढेको बताइन्। सर्केगाड गाउँपालिका–१ का सचिव पाण्डब बुढाका अनुसार जैर बेतालमा राखिएको टावरले काम गर्न छोडेपछि वडाका विभिन्न स्थानका बासिन्दा सञ्चारविहीन बनेका छन्।
नेपाल टेलिकम हुम्लाकी प्रमुख रिन्जिन लामाले सोरुकोटको रिले टावरमा समस्या देखिएको र प्राविधिक टोली पुगेर मर्मतको काम भइरहेको जानकारी दिइन्।
