छठ पर्व मनाउने क्रममा कसैमाथि जातीय विभेद नगर्न सरकारले आग्रह गरेको छ। महिला, बालबालिका, लैंगिक तथा यौनिक अल्पसंख्यक र सामाजिक सुरक्षा मन्त्रालयले बिहीबार विज्ञप्ति जारी गर्दै पर्वका बेला छुवाछूतजन्य कुनै पनि गतिविधि नगर्न सबैको ध्यानाकर्षण गराएको हो।
मन्त्रालयले विशेषगरी दलित समुदायका लागि छुट्टै घाट बनाउने वा बनाउन लगाउने जस्ता अभ्यास नगर्न भनेको छ। छठ धार्मिक, सामाजिक र सांस्कृतिक सद्भावको प्रतीक भएको उल्लेख गर्दै मन्त्रालयले यस पर्वले आपसी मेलमिलाप, बन्धुत्व र राष्ट्रिय एकतालाई बलियो बनाउने विश्वास व्यक्त गरेको छ। जात, वर्ग वा समुदायका आधारमा कसैलाई अलग्याउने वा विभेद गर्ने काम नगर्न मन्त्रालयले अनुरोध गरेको छ।
संविधानको धारा १८ ले समानताको हक र धारा २४ ले छुवाछूत तथा भेदभावविरुद्धको हक सुनिश्चित गरेको मन्त्रालयले स्मरण गराएको छ। जातीय भेदभाव तथा छुवाछूत (कसुर र सजाय) ऐन, २०६८ अनुसार जातीय आधारमा छुवाछूत र भेदभाव गर्नु दण्डनीय कसुर हुने पनि विज्ञप्तिमा उल्लेख छ।
सार्वजनिक स्थानमा प्रवेश रोक्ने, जातीय आधारमा छुट्टाछुट्टै घाट बनाउने वा कुनै समुदायलाई अलग राख्ने काम संविधानको मर्म र समानताको सिद्धान्तविपरीत हुने मन्त्रालयको भनाइ छ। यस्ता गतिविधि हुन नदिन स्थानीय तह, सुरक्षा निकाय, नागरिक समाज, सञ्चारकर्मी र सम्पूर्ण नागरिकलाई जिम्मेवार भूमिका खेल्न मन्त्रालयले आग्रह गरेको छ।
मन्त्रालयले सबै जातजाति, वर्ग, क्षेत्र र समुदायको समान अधिकार, आत्मसम्मान र समावेशी सहभागितासहितको समतामूलक समाज निर्माणमा आफू प्रतिबद्ध रहेको जनाएको छ। यसैबीच मन्त्रालयले छठ पर्वको अवसरमा स्वदेश तथा विदेशमा रहेका सम्पूर्ण नेपालीलाई सुख, शान्ति, समृद्धि र सुस्वास्थ्यको शुभकामना दिएको छ।
