सप्तरीको बोदेबरसाईन नगरपालिकाले कृषि प्रयोजनका विद्युत् मिटरको महसुलमा दिँदै आएको अनुदान भुक्तानी रोक्ने निर्णय गरेको छ। नगरपालिकाले सूचना जारी गर्दै आगामी आर्थिक वर्ष २०८३/८४ देखि कृषि विद्युत् मिटरको महसुल सम्बन्धित किसान आफैंले नेपाल विद्युत् प्राधिकरणमा बुझाउनुपर्ने जनाएको छ।
नगरपालिकाका अनुसार अर्थ मन्त्रालयले अनिवार्यबाहेकका अन्य खर्च कटौती गर्न दिएको निर्देशनअनुसार कृषि विद्युत् मिटरको अनुदान तथा महसुल भुक्तानीको काम हाललाई स्थगित गरिएको हो। आर्थिक वर्ष २०८१/८२ र २०८२/८३ मा नगरपालिकाका विभिन्न वडाबाट कृषि विद्युत् मिटरका लागि दर्ता भएका किसानहरूको आर्थिक वर्ष २०८२/८३ को असार मसान्तसम्मको विद्युत् महसुल भने नगरपालिकाले नै भुक्तानी गर्नेछ।
निमित्त प्रमुख प्रशासकीय अधिकृत रामसागर यादवका अनुसार असार मसान्तसम्मको महसुल नगरपालिकाले तिरेपछि त्यसपछिको महसुल किसान स्वयंले समयमै प्राधिकरणमा बुझाउनुपर्नेछ। नगरपालिकाकी कृषि विकास अधिकृत हिमानी यादवले पनि आर्थिक वर्ष २०८३/८४ देखि लागु हुने गरी महसुल भुक्तानीको जिम्मेवारी किसानकै हुने बताइन्।
नगरपालिकाले महसुल तिर्न छाडेपछि यहाँका किसान प्रभावित हुने देखिएको छ। यसअघि नगरपालिकाले भुक्तानी गर्दै आएको महसुल अब आफैंले तिर्नुपर्ने भएपछि किसानलाई थप आर्थिक भार पर्ने देखिन्छ।
