दसैं, तिहार तथा छठ पर्वको सार्वजनिक बिदामा पनि वैदेशिक रोजगारीका क्रममा मृत्यु भएका नेपाली श्रमिकको शव नि:शुल्क ढुवानी हुने भएको छ । चाडपर्वमा सेवा नरोक्ने गरी वैदेशिक रोजगार बोर्डले व्यवस्था मिलाएको हो ।
बोर्डको सचिवालयले त्रिभुवन अन्तर्राष्ट्रिय विमानस्थलदेखि मृतक श्रमिकको घरको ठेगानासम्म शव नि:शुल्क पुर्याउने सेवा निरन्तरता दिन चौबिसै घण्टा सेवा सञ्चालन हुने गरी सम्पर्क कर्मचारी र ढुवानी सेवा प्रदायक तोकेको छ । वैदेशिक रोजगार नियमावली २०६४ को नियम २८ (क) अनुसार यो सेवा यसअघि पनि प्रदान हुँदै आएको थियो ।
सेवासम्बन्धी जानकारी वा समन्वयका लागि सूचना अधिकारी तथा प्रवक्ता शारदा भण्डारी र सुरज ढुंगानालाई सम्पर्क गर्न सकिने बोर्डले जनाएको छ । ढुवानी सेवाका लागि सेती गणेश सप्लायर्स, आरडी ढुवानी सेवा र बुद्धध्वज ढुवानी सेवासँग सम्पर्क गर्न सकिनेछ ।
बोर्डले सेवा नि:शुल्क र निरन्तर सञ्चालन हुने भन्दै सम्बन्धित परिवारलाई तोकिएका सम्पर्क नम्बरमा सम्पर्क गर्न आग्रह गरेको छ । थप जानकारीका लागि टोल फ्री नम्बर ११४१ मा सम्पर्क गर्न सकिन्छ ।
