काठमाडौं । सर्वोच्च अदालतका न्यायाधीशका लागि सिफारिस भएका चारै जनाको नाम संसदीय सुनुवाइ समितिले अनुमोदन गरेको छ । समितिले उजुरीमाथि छलफल सकेर सुनुवाइ पूरा गरेपछि अनुमोदनको निर्णय गरेको हो ।
न्यायपरिषद्ले उच्च अदालत पोखराका मुख्य न्यायाधीश डा. रत्नबहादुर बागचन्द, चन्द्रबहादुर सारु, जनक पाण्डे र गोकर्ण डाँगीलाई सर्वोच्चको न्यायाधीशमा सिफारिस गरेको थियो । चारै प्रस्तावित न्यायाधीशविरुद्ध समितिमा १३ वटा उजुरी परेका थिए ।
शुक्रबार र शनिबार सिंहदरबारस्थित संसदीय समितिमा उनीहरूको सुनुवाइ भएको थियो । दुई दिन चलेको सुनुवाइमा समितिले उजुरीका विषयमा छलफल गर्यो र प्रस्तावित न्यायाधीशहरूले समितिका प्रश्नहरूको जवाफ दिएका थिए । छलफल र सुनुवाइ पूरा भएपछि समितिले चारै जनाको नाम अनुमोदन गर्ने निर्णय गरेको हो ।
समितिबाट नाम अनुमोदन भएपछि अब उनीहरूको नियुक्तिको प्रक्रिया अघि बढ्नेछ । सर्वोच्च अदालतमा लामो समयदेखि न्यायाधीशको रिक्त पद रहँदै आएको अवस्थामा चारै जनाको नाम अनुमोदन हुनुलाई महत्त्वपूर्ण मानिएको छ ।
