चालु आर्थिक वर्षको पहिलो तीन महिनामा चितवनमा वंशजका आधारमा तीन हजार ६२ जनाले नागरिकता लिएका छन्। सोही अवधिमा छ हजार सात सय ६६ प्रतिलिपि जारी भए भने २८ जनाले नागरिकता परित्याग गरे।
जिल्ला प्रशासन कार्यालय र माडीस्थित इलाका प्रशासन कार्यालयबाट यी नागरिकता वितरण भएका हुन्। जिल्ला प्रशासन कार्यालयबाट दुई हजार आठ सय २४ जनाले वंशजको नागरिकता पाएका छन्, जसमा एक हजार चार सय १८ महिला र एक हजार चार सय छ पुरुष छन्। माडी कार्यालयबाट दुई सय ३८ जनाले नागरिकता लिएका छन्, जसमा एक सय २२ महिला र एक सय १६ पुरुष छन्।
जिल्ला प्रशासन कार्यालयबाट १५ महिलाले वैवाहिक अङ्गीकृत र ११ जनाले अङ्गीकृत नागरिकता पाएका छन्। अङ्गीकृत नागरिकता पाउनेमा सात महिला र चार पुरुष छन्। गैरआवासीय नेपाली नागरिकता लिनेको सङ्ख्या ३१ छ, जसमा नौ महिला र २२ पुरुष छन्। माडीबाट एक महिलाले वैवाहिक अङ्गीकृत र एक जनाले अङ्गीकृत नागरिकता लिएका छन्।
प्रतिलिपि जिल्लाबाट छ हजार एक सय १६ र माडीबाट छ सय ५० वटा जारी भएका छन्। जिल्लाबाट प्रतिलिपि लिनेमा दुई हजार नौ सय ८७ महिला, तीन हजार एक सय २८ पुरुष र एक अन्य छन्। माडीबाट प्रतिलिपि लिनेमा तीन सय २३ महिला र तीन सय २७ पुरुष छन्।
नागरिकता परित्याग गर्ने २८ जनामा १० महिला र १८ पुरुष छन् भने चार जनाको नागरिकता रद्द गरिएको छ। राष्ट्रिय परिचयपत्रका लागि जिल्लामा ११ हजार नौ सय ९७ जनाको नयाँ विवरण दर्ता र चार हजार तीन सय ७० वटा वितरण भएका छन्। राहदानीका लागि पाँच हजार आठ सय ५२ सिफारिस र चार हजार दुई सय ४३ वितरण भएका छन्।
