चितवन राष्ट्रिय निकुञ्जले चाडपर्वलाई लक्षित गर्दै विशेष सुरक्षा रणनीति तयार गरेको छ । चोरी सिकारी नियन्त्रणका लागि निकुञ्ज प्रशासन र निकुञ्ज सुरक्षामा खटिएको नेपाली सेनाका गरी एक हजार दुई सयभन्दा बढी जनशक्ति परिचालन गरिने निकुञ्जले जनाएको छ ।
निकुञ्जका सूचना अधिकारी अविनास थापा मगरका अनुसार चाडपर्वको समयमा निकुञ्जभित्र अपरिचित मानिसको चहलपहल बढ्ने हुँदा चोरी सिकारीको जोखिम बढ्छ । यही जोखिमलाई मध्यनजर गर्दै उच्च सतर्कता अपनाइएको उनको भनाइ छ । संवेदनशील क्षेत्रमा अहिले ३५ स्पाई क्यामेरा जडान गरेर निगरानी भइरहेको छ ।
जोखिम भएका क्षेत्रमा स्पाई क्यामेरासहित क्याम्पिङ र एम्बुसिङका गतिविधि सञ्चालन गरिनेछ । नियमित गस्तीसँगै स्विपिङ, पट्रोलीङ, साइकल गस्ति, मोटरसाइकल गस्ति तथा डुंगा, गाडी र हात्तीबाट पनि गस्ति हुने मगरले बताए । स्थानीय बासिन्दा पर्व मनाउन व्यस्त हुने समयमा चोरी सिकारी बढी संवेदनशील हुने मानिन्छ ।
निकुञ्जभित्रका ५७ स्थायी र तीन अस्थायी पोष्टबाट सुरक्षा दिइँदै आएको छ । शंकास्पद स्थानमा तालिम प्राप्त कुकुरमार्फत पनि निगरानी गरिनेछ । आवश्यकता अनुसार अन्य सुरक्षा निकायसँग समन्वय गरेर निकुञ्जभित्रका बस्तीमा समेत निगरानी बढाइएको सूचना अधिकारी मगरले जानकारी दिए ।
