मुम्बई — अभिनेता इमरान खानले आफूमाथि लगाइएको भारत छाड्ने आदेशविरुद्ध शनिबार बम्बे हाईकोर्टमा रिट निवेदन दर्ता गराएका छन्। अभिनेता आमिर खानका भान्जा इमरानले प्रशासनिक आदेशलाई मनपरी, गैरकानुनी र असंवैधानिक भएको टिप्पणी गर्दै अदालतको शरण लिएका हुन्।
मुम्बईस्थित फरेनर्स रिजनल रजिस्ट्रेसन अफिस (एफआरआरओ) ले इमरानलाई ओभरसिज सिटिजन अफ इन्डिया (ओसीआई) कार्ड किन रद्द नगर्ने भनी दोस्रो नोटिससमेत पठाएको छ। उक्त नोटिसको जवाफ दिन उनलाई १५ दिनको समयावधि दिइएको छ। यसअघि जारी पहिलो नोटिसमा उनलाई अक्टोबर २८ भित्र भारत छाड्न आदेश दिइएको थियो।
इमरानले आफ्ना वकिलमार्फत दायर गरेको रिटमा ओसीआई कार्डवाहकलाई शान्तिपूर्ण प्रदर्शनमा सहभागी हुनबाट रोक्ने कुनै कानुन नरहेको जिकिर गरेका छन्। प्रहरीले कुनै ठोस कारण र कागजातविना नोटिस जारी गरेको भन्दै उनले यो कदमले भारतीय संविधानको धारा १४ र २१ को उल्लङ्घन गरेको दाबी गरेका हुन्।
गत अक्टोबर १० मा मुम्बईमा मुख्य निर्वाचन आयुक्त ज्ञानेश कुमारको राजीनामा माग्दै आयोजित प्रदर्शनमा सहभागी भएको अभियोगमा इमरानलाई प्रहरीले हिरासतमा लिएको थियो। तर उनका वकिलहरूको भनाइ भने फरक छ — उनीहरूले इमरान त्यो दिन बाटो हुँदै जाँदा सडक बन्द भएकाले सर्वसाधारणका रूपमा अडिएका र मिडियालाई प्रतिक्रिया मात्र दिएको दाबी गरेका छन्।
यसैबीच, नोटिसबारे विवाद चर्किइरहेका बेला आमिर खानले आइतबार मुम्बईमा महाराष्ट्र नवनिर्माण सेनाका अध्यक्ष राज ठाकरेसँग भेटवार्ता गरेको खबर बाहिरिएको छ। उनीहरूबीचको छलफलको विषय भने सार्वजनिक हुन सकेको छैन।
