बोगोटा – दक्षिणपश्चिम कोलम्बियाको नारिनो प्रान्तमा इजाजतबिना सञ्चालन हुँदै आएको खुला सुनखानी भत्किँदा कम्तीमा १४ जनाको ज्यान गएको छ भने सात जना घाइते भएका छन् । सोमबार रातिसम्म चलेको खोजी तथा उद्धार अभियान सकिएसँगै मृतकको सङ्ख्या पुष्टि भएको हो ।
प्रान्तीय सरकारका अनुसार सान्ता बार्बरा डे इस्कुआन्डे सहरनजिकैको खानीमा घटना भएको हो । प्रान्तीय प्रशासनले यस घटनाले बिना दर्ता सञ्चालन हुने खानीहरूमा रहेको गम्भीर जोखिम फेरि उजागर गरेको जनाएको छ । तीन महिनाभित्र नारिनोमा खानी भत्किँदा मृत्यु हुनेको सङ्ख्या २७ पुगेको सरकारी तथ्याङ्कले देखाउँछ ।
घना वर्षावनले घेरिएको सान्ता बार्बरा डे इस्कुआन्डे डुङ्गा वा साना विमानबाट मात्र पुग्न सकिन्छ । अत्यन्त दुर्गम भएकाले उद्धारकर्मीलाई घटनास्थल पुग्न धेरै समय लागेको थियो । नारिनोका गभर्नर लुइस अल्फोन्सो एस्कोबारले दुर्घटनाप्रति शोक व्यक्त गर्दै पूरै परिवार प्रभावित भएको बताए ।
कोलम्बियामा सरकारी अनुमति नलिई सञ्चालित साना खानीको सङ्ख्या सयौँ छ, जसमध्ये केही सशस्त्र समूहको नियन्त्रणमा छन् । सन् २०१६ को शान्ति सम्झौतामा सामेल नभएका फार्कका पूर्वसदस्यको नेतृत्वमा रहेको ज्याकोबो एरेनास समूहसहित दुई विद्रोही समूह उक्त क्षेत्रमा सक्रिय छन् । लोकपाल कार्यालयले सशस्त्र समूहहरूलाई प्रभावित सहरमा मानवीय सहयोग पुर्याउन अवरोध नगर्न आग्रह गर्दै सबै प्रयास जीवन रक्षामा केन्द्रित हुनुपर्ने बताएको छ ।
