हप्तान्तभरि चर्किएको हिंसा र तोडफोडपछि फ्रान्सेली सरकारले राजधानी पेरिससहित देशका प्रमुख सहरहरूमा रात्रिकालीन कर्फ्यु लगाएको छ। कर्फ्यु राति ११ बजेदेखि बिहान ६ बजेसम्म लागू हुने पेरिस प्रहरीले जनाएको छ।
प्लेस दे ला रिपब्लिक र लेस हालेस किनमेल क्षेत्र जस्ता भिडभाड हुने स्थानमा राति कर्फ्यु तोड्नेहरूमाथि कडा कारबाही हुनेछ। त्यस्तै, सहरका विभिन्न भागमा बिना अनुमति भेला हुन पूर्ण प्रतिबन्ध लगाइएको छ। मार्से, बोर्दो, निस र लियोनजस्ता दक्षिणी सहरहरूमा र उत्तरको लिलमा युवाहरूको आवतजावत र भीडभाडमा आंशिक प्रतिबन्ध घोषणा गरिएको छ।
विद्यालयको अवस्था सुधारको माग राखेर विद्यार्थीहरूले गत महिना थालेको आन्दोलनमा अहिले ट्रेड युनियन तथा अन्य विरोध समूह पनि जोडिएका छन्। प्रदर्शन नियन्त्रणबाहिर गएको र केही सहरमा प्रहरीको नियन्त्रण गुमेको गृहमन्त्री लोरियान्ट न्युनेजले नै स्वीकार गरेका छन्। न्युनेजले दिएको राजीनामा राष्ट्रपति इम्यानुएल म्याक्रोंले अस्वीकार गरेका छन्।
हालसम्म २ हजार ५ सयभन्दा बढी प्रदर्शनकारी पक्राउ परेका छन् भने करिब १ हजार प्रहरी घाइते भएका छन्। प्रदर्शनका क्रममा प्रहरीले हानेको अश्रुग्यास र ग्रिनेट लागेर एक प्रदर्शनकारीको हात छिन्नभिन्न भएको बताइएको छ।
प्रधानमन्त्री सेबस्टियन लेकोर्नुले संकटकाल घोषणा हुनसक्ने सम्भावनालाई खण्डन गर्दै सार्वजनिक तथा निजी सम्पत्तिमा क्षति पुर्याउनेहरूबाटै क्षतिपूर्ति असुल्ने गरी कानुन ल्याइने घोषणा गरेका छन्। फ्रान्सको चेम्बर अफ कमर्स एन्ड इन्डस्ट्रीका अनुसार हप्तान्तको हिंसाबाट २ हजारभन्दा बढी पसल तथा व्यवसाय प्रत्यक्ष प्रभावित भएका छन् र करोडौँ युरो बराबरको भौतिक क्षति भएको अनुमान छ।
