अमेरिकाको आप्रवासन हिरासतमा मेक्सिकोका अर्का नागरिकको मृत्यु भएपछि मेक्सिको सरकारले अमेरिकाप्रति तिखो असन्तुष्टि जनाएको छ । पछिल्लो घटनासँगै राष्ट्रपति डोनाल्ड ट्रम्पले दोस्रो कार्यकाल सम्हालेदेखि अमेरिकी हिरासतमा ज्यान गुमाउने मेक्सिकन नागरिकको संख्या १८ पुगेको छ ।
मेक्सिकोको विदेश मन्त्रालयले जारी गरेको विज्ञप्तिमा अमेरिका–मेक्सिको सीमामा पर्ने लारेडो सहरको आप्रवासी प्रशोधन केन्द्रमा यो पछिल्लो मृत्यु भएको उल्लेख छ । मन्त्रालयका अनुसार मृतकको नामावली सार्वजनिक गरिएको छैन, तर उनका परिवारसँग सम्पर्क स्थापित गरिएको छ ।
हिरासतमा रहेका मेक्सिकन नागरिकको निरन्तर मृत्यु भइरहेको विषयलाई मन्त्रालयले गम्भीर चिन्ताको रूपमा चित्रण गरेको छ । यस्ता घटनामा अमेरिकी अधिकारीहरूले जवाफदेहिताका साथ प्रभावकारी कदम चाल्नुपर्नेमा विज्ञप्तिमा जोड दिइएको छ । मेक्सिकोले घटनाको तत्काल, विस्तृत र पारदर्शी अनुसन्धानको माग गर्दै पछिल्लो मृत्युबारे पनि औपचारिक उजुरी दर्ता गर्ने चेतावनी दिएको छ ।
यसअघि आप्रवासन तथा भन्सार प्रवर्तन निकाय (आईसीई) को हिरासतमा १७ मेक्सिकन नागरिकको मृत्यु भएको घटनामा मेक्सिकोले गत जुलाईमा नै फौजदारी उजुरी दिएको थियो । आईसीईले भने पछिल्लो मृत्युसम्बन्धी कुनै विवरण सार्वजनिक गरेको छैन ।
ट्रम्पले चुनावी वाचा अनुसार अमेरिकी इतिहासकै ठूलो सामूहिक निर्वासन अभियान चलाइरहँदा देशभर आप्रवासी पक्राउको सिलसिला जारी छ । विवरणअनुसार गत वर्ष अमेरिकाका आप्रवासी हिरासत केन्द्रहरूमा कम्तीमा ३० जनाको मृत्यु भएको थियो, जुन सन् २००४ मा आईसीई स्थापना भएयताकै सबैभन्दा बढी वार्षिक सङ्ख्या हो ।
