प्रसिद्ध बौद्ध भिक्षुणी तथा गायिका आनी छोइङ डोल्मा लुम्बिनी विकास कोषको उपाध्यक्षमा मनोनीत भएकी छन्। गत असोज ३० गते बसेको मन्त्रिपरिषद् बैठकले संस्कृति, पर्यटन तथा नागरिक उड्डयन मन्त्रालयको सिफारिसमा लुम्बिनी विकास कोष ऐन, २०४२ को दफा ८ (१) (ख) बमोजिम उनलाई सो पदमा नियुक्त गर्ने निर्णय गरेको हो।
तर नियुक्ति सार्वजनिक भएलगत्तै उनीसँग जोडिएको पुरानो सम्पत्ति शुद्धीकरणसम्बन्धी विवाद पुनः सतहमा आएको छ। बौद्ध आस्थाको अन्तर्राष्ट्रिय केन्द्र मानिने लुम्बिनीमा स्रोत नखुलेको रकम भित्र्याएको आरोपमा अनुसन्धानको दायरामा तानिएकी व्यक्तिलाई महत्त्वपूर्ण जिम्मेवारी दिइएको भन्दै विभिन्न क्षेत्रबाट आलोचना सुरु भएको हो।
आलोचकहरूले विवादित आर्थिक पृष्ठभूमि भएकी व्यक्तिलाई यस्तो पदमा ल्याउँदा सुशासन र नैतिक आचरणमाथि गम्भीर प्रश्न उठ्ने तर्क गरेका छन्। लुम्बिनी विश्व बौद्ध समुदायको प्रमुख आस्थाकेन्द्र रहेकाले त्यहाँको नेतृत्वमा निष्पक्षता र पारदर्शिता अपरिहार्य हुने उनीहरूको भनाइ छ।
यता नियुक्तिलाई लिएर सार्वजनिक बहस चर्किँदै गएपछि सरकारले औपचारिक प्रतिक्रिया दिनुपर्ने दबाब बढेको छ। विवाद थप चर्किएको अवस्थामा सरकारले कस्तो कदम चाल्छ भन्नेमा सबैको चासो छ।
