मकवानपुरको हेटौँडामा पिकअप गाडी र मोटरसाइकल एकापसमा ठोक्किँदा मोटरसाइकल चालकको मृत्यु भएको छ। मृत्यु हुनेमा हेटौँडा उपमहानगरपालिका–१०, बुद्धचोक निवासी ४२ वर्षीय विनोद लामा रहेको मकवानपुर प्रहरीले जनाएको छ।
जिल्ला प्रहरी कार्यालय मकवानपुरका प्रवक्ता तथा प्रहरी नायव उपरिक्षक माधवप्रसाद काफ्लेका अनुसार हेटौँडा उपमहानगरपालिका–१ को सामरीस्थित हेटौँडा–भैँसे सडकखण्डमा आज अपराह्न करिब ४ः५० बजे दुर्घटना भएको हो। हेटौँडाबाट भैँसेतर्फ जाँदै गरेको खुर्सानी बोकेको पिकअप गाडी र विपरीत दिशाबाट आउँदै गरेको मोटरसाइकल एकापसमा ठोक्किँदा दुर्घटना भएको प्रहरीले जनाएको छ।
दुर्घटनामा गम्भीर घाइते भएका चालक लामालाई उपचारका लागि हेटौँडा अस्पताल लगिएको थियो। चिकित्सकले साँझ ५ः१० बजे उनलाई मृत घोषणा गरेका हुन्।
प्रहरीले दुर्घटनामा परेका बा.प्र.०१–०३२ च ०१४१ नम्बरको पिकअप गाडी र बा.४७ प ८४६१ नम्बरको मोटरसाइकलसँगै पिकअप चालकलाई नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
