बंगलादेशको राजधानी ढाकामा जारी आइएचएफ नेसन्स वुमेन्स ट्रफी २०२६ को जोन–२ मा नेपाली महिला ह्यान्डबल टोलीले शानदार कमब्याक गरेको छ। पहिलो खेलमा आयोजक बंगलादेशसँग पराजय भोगेको नेपाली टोलीले दोस्रो खेलमा माल्दिभ्सलाई २४–१८ गोल अन्तरले पराजित गर्दै प्रतियोगितामा जितको खाता खोलेको हो।
मंगलबार भएको खेलमा नेपाल सुरुदेखि नै आत्मविश्वासपूर्ण देखियो। बलियो रक्षा र तीव्र आक्रमणबीच नेपालले गोल अन्तर फराकिलो बनाउँदै माल्दिभ्सलाई निरन्तर दबाबमा राख्यो। खेलमा उत्कृष्ट प्रदर्शन गरेकी विमला तामाङ प्लेयर अफ द म्याच घोषित भइन्।
अन्तर्राष्ट्रिय ह्यान्डबल महासंघको आयोजनामा भइरहेको प्रतियोगितामा नेपालले अहिलेसम्म एक जित र एक हार निकालेको छ। बन्दना राईको कप्तानीमा रहेको नेपाली टोलीले अब तेस्रो खेल बुधबार भारतसँग खेल्नेछ।
टोलीमा उमा राई, देवकुमारी बास्कोटा, विमला तामाङ, दुर्गा बोहरा, हिलिना राना, कल्पना ओली, कोमली खड्का, समिना चौधरी, सम्झना कुमाल, संगीता चौधरी, सञ्जु राई, शान्तिकला राई र ममता राना छन्। टोलीको प्रशिक्षक सुशील अधिकारी रहेका छन्।
